Contestaçom
popular contra a ameaça de um novo recheio na Ria de Ferrol
29 de Outubro de 2003
O Governo muncipal
de Ferrol, formado polo Partido Popular e Independentes por Ferrol, pretende
impor um delirante projecto de construçom de umha estaçom de
bombeio na beira da Ria de Ferrol, à altura da Cabana.
Na verdade, trata-se
de um velho projecto do Ministério espanhol do Ambiente que, com a
escusa de acometer a sempre adiada construçom da depuradora na Ria,
ideou um recheio de quase 6.000 metros quadrados numha zona de marisqueio.
A resposta da vizinhança da zona nom demorou. Na passada sexta-feira, meio milhar de pessoas saírom às ruas para exigir a retirada de um projecto que ajudará a destruir o principal recurso natural e económico da comarca trasanquesa. Os vizinhos e vizinhas chegárom até o recinto em que se prevê iniciar as obras, derrubando o valado e anunciando novas mobilizaçons para os próximos dias.
NÓS-Unidade
Popular participou na citada mobilizaçom, depois de ter feito público
em numerosas ocasions o rechaço aos diversos atentados que as instituiçons
municipais e autonómica tenhem verificado e anunciado contra a Ria
de Ferrol. Já no passado mês de Setembro, NÓS-UP
denunciou a tentativa de levar a cabo umhas obras desnecessárias e
agressivas com o litoral ferrolano.
Na manifestaçom
participárom também os partidos da oposiçom institucional,
BNG, PSOE e IU, todos eles co-responsáveis pola grave situaçom
ambiental da Ria. O BNG e o PSOE governavam em Ferrol quando o projecto de
recheio foi aprovado polo Ministério espanhol do Ambiente, sem ter
apresentado alegaçom nengumha. Quanto a IU, recentemente reclamou desde
o governo de Neda um recheio no litoral da Ria aproveitando o entulho sobrante
das obras da auto-estrada nas proximidades. Porém, as três forças
levárom representantes à manifestaçom, dando mostras
de grande oportunismo e provocando protestos entre a vizinhança.
Depois da primeira
mobilizaçom, PP e IF anunciárom que o projecto será modificado
para reduzir as dimensons do recheio. Trata-se sem dúvida de umha tentativa
de desactivar a resposta popular, sem afectar a natureza destrutora das obras
numha Ria gravemente deteriorada por recheios como as do porto carvoeiro,
o realizado por Tojeiro em Mugardos, as obras do Porto Exterior e um longo
etcétera de agressons que contam com o aval de todas as forças
políticas institucionais da comarca.
Espera-se que a vizinhança da Cabana, apoiada polas associaçons vicinais do concelho ferrolano, anunciem próximas medidas de pressom contra o recheio. NÓS-UP já anunciou o seu incondicional apoio às reivindicaçons populares e o seu rechaço nom só ao recheio da Cabana, como também às obras do Porto Exterior e da Planta de Gás.