Unificam-se duas organizaçons armadas corsas
14 de Agosto de 2003

A facçom armada independentista "Resistenza Corsa" acaba de anunciar a sua integraçom nas fileiras da "Frente de Libertaçom Nacional Corsa-Uniom de Combatentes" (FLNC-UC). Resistenza Corsa surgira em Dezembro de 2002, assumindo desde a altura numerosas acçons armadas contra interesses franceses e do narcotráfico no norte da ilha, nomeadamente na capital do norte, Bástia.

Resistenza Corsa anunciou a continuidade da luita contra o narcotráfico, se bem situou como prioridade a luita contra o "Estado colonial francês". Ao mesmo tempo, fijo um chamado para que a organizaçom armada independentista "Irmaos da FLNC número 3", grupo dissidente surgido no passado mês de Outubro, participe também na unificaçom da resistência armada corsa.

Entretanto, na passada madrugada foi atacado com explosivos um prédio administrativo francês em Ajaccio, cidade do sul da ilha. Nesta ocasiom, o objectivo foi a sede da Direcçom Departamental de Equipamento e da Direcçom Regional de Indústria e Investigaçom, ainda que ao longo do verao tenhem sido grande número de interesses turísticos e institucionais franceses os atacados pola resistência corsa. A ofensiva independentista seguiu-se ao anúncio do ministro de Interior francês de intensificar a repressom, logo que a proposta do seu governo para variar o estatuto da ilha no Estado francês fosse rejeitada em referendo.




Voltar à página principal