Centro Social da Fundaçom Artábria cumpriu 10 anos

1 de Outubro de 2008

Nestes dias, diferentes meios informam do primeiro decénio de vida do Centro Social reintegracionista mais antigo do País: o da Fundaçom Artábria, localizado actualmente no bairro de Esteiro de Ferrol, e anteriormente no centro dessa cidade, no bairro da Madalena. Com motivo dos 10 anos, a entidade propom um programa de actividades variadas para os meses de Setembro e Outubro.

Foi em 1998 quando a Associaçom da Língua Artábria, de carácter comarcal, que vinha fazendo trabalho desde inícios da década de 90, com a incorporaçom de sectores dos movimentos sociais de Trasancos preocupados com a situaçom do idioma, deu o passo de abrir o primeiro Centro Social reintegracionista e monolíngüe.

Desde aquele ano, outras cidades e vilas da Galiza seguírom os passos da Artábria, favorecendo o uso do galego na vida social e artística, e oferecendo meios para a dinamizaçom de todo o tipo de entidades populares nas respectivas comarcas, de maneira autogerida e à margem de qualquer subordinaçom às instituiçons.

O Festival da Terra e da Língua, as iniciativas e campanhas normalizadoras, a cessom de espaço a outros colectivos, a organizaçom de conferências, concertos, cursos e todo o tipo de actividades, que em nom poucas ocasions só fôrom possíveis no local da Fundaçom Artábria, fam desse Centro Social um espaço alternativo e aberto a quem acredita que um outro mundo é possível.

Nom queremos deixar de parabenizar todas as pessoas que em todos estes anos ajudárom a levantar esse projecto, nem de manifestar os nossos desejos de que a Fundaçom Artábria continue avante por mais 10 anos.

Eis o programa completo de celebraçom publicado pola Fundaçom Artábria no seu blogue:

- Na sexta-feira 26 de Setembro às 22h, Leo e Arremecaghona apresentará o livro publicado por Xerais “Hai cu” com um espectáculo multimerda. Di que vai fazer todo o que fai normalmente no váter: esbardalhar monologando, fazer pintagens poéticas e tocar e cantar (que é o sítio que melhor acústica tem).

- No Sábado 27 de Setembro, às 21h, organizamos no Restaurante Cantábrico, em Fene, umha ceia de confraternizaçom para celebrar estes dez anos de trabalho polo reintegracionismo lingüístico, o monolingüismo social e na defesa da nossa cultura. Antes da ceia, projectarám-se imagens que resumirám o trabalho do nosso Centro Social nestes anos.
Também haverá música com umha actuaçom surpresa.

- No Sábado 4 de Outubro, às 22h, actuará por segunda vez no nosso Centro Social o multi-instrumentista brasileiro Sérgio Tannus. Sérgio Tannus possui umha vasta experiência em composiçom e arranjo, que pode ser verificado nos seus trabalhos gravados nos CDs de diversos cantores como: Lilian França, Raul Menezes e Coral da Casa das Meninas (infantil), onde também actuou como produtor musical (gravaçom, mixagem e masterizaçom), todos lançados polo selo Niterói Discos. Fijo a pré-produçom dos CDs do grupo Boca Que Usa e Fala do Sol, entre outros trabalhos.
O preço do bilhete é de 3 euros para as pessoas nom sócias e 2 euros para @s sóci@s.

- Na sexta-feira, 10 de Outubro, às 22h, contaremos com as contadas do actor viguês Cándido Pazó. O preço do bilhete é de 3 euros para pessoas nom associadas e 2 euros para as associadas.

- Na sexta-feira, 17 de Outubro, também às 22h, chega desde Fene umha das mais conhecidas contacontos do nosso país: Paula Carvalheira. O preço do bilhete será também de 3 euros e 2 euros.

- No sábado 25 de Outubro, o escritor João Aveledo apresentará o seu trabalho “Arceia” editado pola Fenda Editora.
Após a apresentaçom do livro, contaremos com a actuaçom do actor galego Quico Cadaval, que nos trará os seus contos à Fundaçom Artábria. Será a partir das 22h e o preço do bilhete é de 3 euros para pessoas nom associadas e 2 euros para pessoas associadas.

- Na sexta-feria 31 de Outubro, às 22h, contaremos com a obra de teatro “Mentes Retelhadas”, por parte da Associaçom Teatral Aturujo de Melpómene. O preço será de 2 euros para sóci@s e 3 euros para nom sóci@s.

Fica atento ou atenta ao nosso web (artabria.net) para conheceres mais activades que vaiamos incluindo no programa do X aniversário nos próximos dias.

 

Voltar à página principal