Brigadistas galeg@s partírom para Cuba

Imagem do encontro de brigadistas com o cônsul da República de Cuba na Galiza

4 de Outubro de 2008

O blogue da Brigada Galega Fuco Gomes informa da partida em direcçom a Cuba dos galegos e galegas integradas na Brigada Internacional de Trabalho Voluntário “50 aniversário do Triunfo da Revoluçom”, num voo que partiu da capital da Galiza anteontem, dia 2 de Outubro.

As compatriotas e os compatriotas que integram a Brigada Internacional fôrom recebidas polo Cônsul da República de Cuba na Galiza, Alejandro Fuentes, que lhes transmitiu informaçons de primeira mao sobre o alcance dos graves prejuízos causados polos furacáns Ike e Gustavo, além de outros menos difundidos polos media que tambem atravessárom a ilha.

A importante resposta internacionalista e a história do processo revolucionário em curso em Cuba fôrom outros temas do encontro com o companheiro Alejandro Fuentes, que despediu os membros galegos da expediçom internacionalista até que, à volta da viagem solidária, mantenham um novo encontro para trocar impressons sobre o trabalho realizado.

A Brigada Galega Fuco Gomes, cujo nome evoca o compatriota que viveu longos anos em Cuba, trabalhando sempre pola independência da Galiza, vai tentar informar sobre o trabalho internacionalista da Brigada Internacional durante as próximas semanas.

Solidariedade activa com Cuba e a revoluçom

Lembramos que a Associaçom de Amizade Galego-Cubana "Francisco Vilhamil" abriu umha conta para angariar fundos de ajuda ao povo cubano, para fazer frente aos elevados prejuízos causados polos furacáns Gustavo e Ike na Ilha. A própria entidade estreou a conta com um contributo de 5.000 €, e encoraja os galegos e galegas a contribuir solidariamente com a luita do povo cubano nuns momentos difíceis como estes. O número de conta, de Caixa Galicia, é o seguinte: 2091 0374 37 3040006520. É importante pôr como conceito "POR CUBA". Para mais informaçom sobre a iniciativa, a associaçom disponibiliza o correio-e: galegocubana@gmail.com

 

Voltar à página principal