Esquerda independentista reivindica Moncho Reboiras

12 de Agosto de 2008

Como cada 12 de Agosto, a esquerda independentista volta a comemorar o aniversário da morte a tiro do militante comunista e independentista José Ramom Reboiras Noia, num confronto com a polícia franquista em Ferrol, no ano 1975.

NÓS-Unidade Popular e BRIGA convocárom actos para hoje nessa cidade do noroeste galego, com motivo do trigésimo terceiro aniversário da morte do militante da UPG, grande construtor do sindicalismo galego nos anos 70 e activista das frentes cultural e armada.

NÓS-Unidade Popular realiza a sua habitual concentraçom na rua da Terra, a partir das 20h30. Além da oferta floral, tomarám a palavra umha militante da entidade juvenil independentista BRIGA e o responsável nacional de Organizaçom de NÓS-UP, Bruno Lopes Teixeiro. Também será afixada umha placa de homenagem a Moncho Reboiras.

BRIGA finda a sua campanha '366 dias de dissidência. 366 murais de subversom'

Por outra parte, BRIGA fai concluir a sua intensa campanha de murais por todo o País com um na cidade de Ferrol precisamente neste 12 de Agosto.

Durante os últimos 12 meses, a juventude independentista e revolucionária conseguiu realizar o total de 366 murais marcados no Verao passado como campanha de dimensom nacional. Grande número de comarcas da Galiza inteira tenhem hoje murais independentistas elaborados pola militáncia e simpatizantes de BRIGA, que investírom um importante esforço no cumprimento desta campanha agitativa.

Identificaçons policiais, multas e alguns julgamentos acompanhárom o exercício de livre expressom juvenil durante todos estes meses, mas nom dérom impedido que BRIGA cumprisse os objectivos marcados. O último mural da campanha vai ser realizado hoje em Ferrol, como mais um tributo à memória de Moncho Reboiras.

:: Olha aqui algumhas galerias com parte dos murais realizados (+...)

 

 

Voltar à página principal