Labregas e labregos denunciam que a Conselharia do Meio Rural está 'vendida'

14 de Novembro de 2008

Os movimentos sociais continuam a agir de maneira crescente contra as políticas ditadas polo neoliberalismo. No caso da política agrária, o facto é mais significativo por corresponder ao BNG a titularidade do departamento de Meio Rural no Governo da Junta.

Assim aconteceu nesta sexta-feira na sede institucional da Conselharia que preside Alfredo Soares Canal, histórico dirigente da UPG. Membros do Sindicato Labrego Galego ocupárom as instalaçons e o escritório do referido político para exigir umha convocatória da Mesa do Leite, que o governo autonómico vem evitando sem justificaçom desde há meses.

A mobilizaçom labrega surpreendeu Soares Canal num acto propagandístico sobre o Banco de Terras perante os meios de comunicaçom, o que deu maior transcendência pública ao facto. Representantes sindicais indicárom que a Junta está a discriminar o sindicato maioritário, o nacionalista SLG, em favor dos próximos do PSOE (Unions Agrárias) e do PP (Jovens Agricultores).

Apesar de reconhecer alguns acertos na política agrária da Junta, o SLG mantém umha posiçom autónoma em relaçom à instituiçom autonómica, defendendo os interesses dos labregos e das labregas, o que provoca a ira do Departamento que dirige Soares Canal e do seu partido, a UPG.

A organizaçom sindical reclama preços justos para o leite, enquanto a Junta está a apoiar as posiçons da grande indústria do sector, evitando que se discuta na Mesa do Leite, onde deve ser assinado um preço mínimo que evite a extorsom empresarial, que está a ser efectuada com a cumplicidade dos outros dous sindicatos agrários. Em concreto, dirigentes do Sindicato Labrego Galego acusam a Conselharia do Meio Rural de estar vendida a empresas como Leite Rio, "com quem está de acordo em baixar o preço do leite".

Em resposta à autonomia sindical do SLG, o sector dirigente do BNG ligado à UPG desenvolve umha dura campanha de ataques à nova maioria sindical, boicotando o seu trabalho e tentando desestabilizá-lo para recuperar o controlo do mesmo.

 

Voltar à página principal