O PSOE, com o apoio do PP e a abstençom do BNG e IU, aprova a presença diária da bandeira espanhola no Paço do Concelho de Fene

7 de Fevereiro de 2004

O PSOE apresentou umha iniciativa municipal ao Pleno da Cámara municipal de Fene, governada com maioria simples polo BNG após ter perdido a maioria absoluta nas últimas eleiçons, para que a bandeira espanhola fique permanentemente pendurada na fachada. O Governo municipal colocava a bandeira de Espanha na fachada da Cámara municipal apenas nos fins de semana. A iniciativa pretendia que a bandeira de Espanha ocupasse lugar de destaque na instituiçom municipal todos os dias, e conseguiu-no.

Os votos dos 5 vereadores do PSOE, somados aos 4 do Partido Popular, configurárom a maioria absoluta frente às abstençons do BNG (7 vereadores/as) e IU (1 vereador). Dias antes do Pleno de ontem, NÓS-Unidade Popular respostou a iniciativa do PSOE com umha proposta alternativa que reclamava a retirada definitiva da "bandeira borbónica e espanhola", argumentando que "nom existe nengumha demanda social para que a bandeira do Estado que nega os direitos colectivos do povo galego esteja presente no Paço do Concelho".

Porém, nengum dos grupos municipais defendeu sequer a manutençom da situaçom anterior. Nem o próprio BNG votou contra a espanholista iniciativa do PSOE. Se bem os votos dos principais partidos espanhóis garantiam a volta permanente da bandeira de Espanha à fachada do Paço do Concelho, o BNG perdeu umha boa ocasiom para manter algumha coerência com a sua suposta condiçom de força nacionalista galega, ficando afinal à altura de Izquierda Unida, na indefinida e acobardada abstençom frente à prepotência espanholista.

Podes ler a proposta apresentada por NÓS-Unidade Popular na Cámara municipal de Fene no web nacional da organizaçom unitária independentista.

 

Voltar à página principal