Colectivos diversos trabalham na criaçom de umha emissora de rádio livre em Trasancos

9 de Janeiro de 2004

Desde o passado mês de Novembro, umha assembleia aberta de pessoas e colectivos estám a trabalhar num projecto de comunicaçom radiofónica na comarca de Trasancos à margem das instituiçons e grupos de pressom privados.

Com experiências como Rádio Kalimero (Compostela), Rádio Piratona (Vigo) ou Cuac FM (Corunha) como referentes, o projecto foi já apresentado no Foro Negro decorrido no mês de Dezembro em Compostela, e conta com a participaçom de pessoas com experiência em diversos meios de comunicaçom e outras que apostam igualmente por construir espaços comunicativos abertos à contrainformaçom.

Questionando a suposta liberdade de expressom em vigor no sistema actual, as pessoas que constroem "Rádio Filispim" criticam os critérios mercantilistas e políticos que regem a concessom legal de freqüências, carentes de qualquer controlo democrático. Daí que as pessoas promotoras apostem por criar umha rede alternativa de comunicaçom partindo da realidade mais imediata, a comarcal, que dê voz aos colectivos sociais. O projecto pretende ser amparado pola Associaçom para a Activaçom de Meios de Comunicaçom Alternativos, além de contar com a colaboraçom do maior número de pessoas e entidades comarcais trasanquesas possível.

Militantes da nossa esquerda independentista estám a participar e apoiar este ambicioso processo que deverá culminar com a posta em andamento da emissora radiofónica comarcal "Rádio Filispim" e da rede cultural alternativa "Rede Filispim".

O nome recolhe a expressom operária "a todo filispim!", com que nos estaleiros ferrolanos se reproduzia deformadamente a expressom trazida por técnicos ingleses "a full speed", e que juntamente com outras acabou por ficar incorporada à memória colectiva do povo desta comarca.

Diversas inicitivas estám a ser activadas na angariaçom de fundos para conseguir a injecçom económica que torne viável a emissora, umha injecçom estimada à roda dos 3.000 euros.


Voltar à página principal