Concentraçom
nacional pola autodeterminaçom em Vigo dentro da campanha de NÓS-UP
10 de Dezembro
No dia 6 de Dezembro
tivo lugar em Vigo o acto central da campanha que nas últimas semanas
promoveu a organizaçom unitária independentista, NÓS-Unidade
Popular, ao longo do país. Diversos actos políticos em cidades
como Ferrol, Lugo, Ponte Areas, Compostela, Corunha e outras, acompanhados
de concentraçons e iniciativas lúdicas que contárom com
a adesom de personalidades do mundo cultural e social galego, dérom
corpo a esta campanha.
O acto de Vigo
congregou à roda das cento e cinqüenta pessoas atrás de
umha faixa de vinte metros com a legenda "Contra a Constituiçom
espanhola: Autodeterminaçom".
As pessoas concentradas coreárom palavras de ordem como "Autonomia
nom: autodeterminaçom", "Galiza naçom, autodeterminaçom",
ou "Que queiram, que nom, Galiza é umha naçom".
Óscar
Gomes falou em nome da Assembleia Comarcal viguesa, enquanto Íria Medranho
dirigiu umhas palavras sobre a campanha desenvolvida sob a legenda "Espanha
é a nossa ruína. Autodeterminaçom", que se prolongou
durante o último mês e meio.
Íria Medranho
reivindicou a criaçom do Estado galego, ao serviço da imensa
maioria social, do povo trabalhador galego, e reivindicou o fim do patriarcado
e o capitalismo na nossa naçom.
A destruiçom
simbólica de um exemplar da Constituiçom espanhola deu passagem
ao canto colectivo do Hino Nacional e a queima de umha bandeira de Espanha
por parte de várias pessoas encapuzadas.