A Galiza comemora os 50 anos da batalha de Dien Bien Phu

4 de Maio de 2004

Debate em comemoraçom da batalha de Dien Bien Phu: "50 anos de Dien Bien Phu. Vietnám: a derrota do imperialismo"

Local: Faculdade de Geografia e História da Universidade de Compostela

Data: Compostela, 7 de Maio de 2004

Hora: 19,30 horas

Participantes: Nguyen Xuan Phog (embaixador vietnamita no Estado espanhol); Xoán Carvalho (sindicalista da CUT); Joám Lopes (sindicalista da CIG); e Elvira Souto (professora da Universidade da Corunha).

Em Maio de 1954, as guerrilhas comunistas e independentistas lideradas por Ho CHi Minh e o general Nguyen Giap derrotárom o imperialismo francês na famosa e heróica batalha de Dien Bien Phu, provocando a sua retirada da Indochina. A sua importáncia estratégica confirmou-se com a constituiçom do Estado operário do Vietnám do Norte e o início de umha nova fase da guerra de libertaçom nacional contra o imperialismo.

Os 550.000 militares enviados à área polos EUA, e os milhons de toneladas de nalpalm despejados sobre território vietnamita, fôrom incapazes de derrotar um exército guerrilheiro de milhares de camponeses pobres, cujo patriotismo e programa comunista acabariam por derrotar também a maquinaria militar mais poderosa do planeta. Os EUA abandonárom precipitadamente a regiom em 1973, prosseguindo a guerra por mais dous anos até a rendiçom final do regime capitalista do Vietnám do Sul, reunificando-se o país sob domínio comunista.

Quando se cumprem 50 anos da épica vitória popular vietnamita contra o imperialismo em Dien Bien Phu, um grupo de pessoas diversas, adscritas ao independentismo e outros sectores nacionalistas galegos, constituírom recentemente a Associaçom de Amizade Galiza-Vietnám, com o intuito de comemorar umha vitória que já ocupa páginas douradas na história da luita antiimperialista dos povos do mundo.

A citada Associaçom, em cuja configuraçom participou o nosso partido, organizou para a próxima sexta-feira, dia 7 de Maio, um debate sobre a significaçom da batalha de Dien Bien Phu, sob o título "50 anos de Dien Bien Phu. Vietnám: a derrota do imperialismo". O debate contará com a participaçom do embaixador vietnamita no Estado espanhol, Nguyen Xuan Phog; Xoán Carvalho, sindicalista da CUT; Joám Lopes, sindicalista da CIG; e Elvira Souto, professora da Universidade da Corunha. O acto decorrerá a partir das 19.30 horas na Faculdade de Geografia e História da Universidade de Compostela.

A seguir do debate público, haverá umha ceia de confraternizaçom e homenagem solidária ao povo vietnamita por parte da Associaçom de Amizade Galiza-Vietnám.

 

Voltar à página principal