Galeusca, capital Madrid

28 de Abril de 2004

Confirmando a orientaçom autonomista das três forças, BNG, CiU e PNB apresentárom ontem em Madrid a coligaçom Galeusca-Povos da Europa, que agrupa essas forças juntamente com o PSM e o BNV com objectivo declarado de se converterem na "terceira força política do Estado". Paradoxalmente, os partidos autonomistas das naçons periféricas do Estado nom escolhêrom nengum dos países de origem (País Basco, Países Cataláns e Galiza) para apresentarem uma candidatura, reforçando a referencialidade simbólica e prática de Madrid como eixo da actividade política de todas elas. BNG, PNB e CiU dam assim carta de natureza à capital espanhola como capital dos nacionalismos periféricos, umha vez descartadas cidades como Barcelona, Irunha ou Compostela para apresentar publicamente a coligaçom entre as opçons burguesas basquista e catalanista e a social-democracia autonomista galega.

Por parte do BNG, o próprio Francisco Rodrigues, deputado no Parlamento espanhol, reconheceu a motivaçom eleitoralista da aliança com as direitas basca e catalá, declarando que "nom é o mesmo concorrer a umhas eleiçons quase com 100% de possibilidades de conseguir um deputado que com a quase segurança de que nom o obtemos". O rejeitamento histórico do BNG a se apresentar coligado com forças alheias à Galiza ficou desta vez descartado pola principal organizaçom do nosso nacionalismo, virada cada vez mais claramente para posiçons meramente autonomistas. Além do dito, e na linha de confundir a sua organizaçom política com o conjunto do nacionalismo e ainda da naçom, Anxo Quintana afirmou que se trata "nom só de um acordo entre partidos, mas entre naçons" (sic). Será que nom há outras opçons nacionais em cada umha das três naçons em questom, para além de BNG, PNB e CiU?

Longe de ser umha decisom anedótica, a eleiçom de Madrid como cenário para a apresentaçom da lista conjunta define a assunçom estratégica de Madrid e do ámbito espanhol como terreno de jogo para estas três organizaçons.


Voltar à página principal