Caça às bruxas na Internet: clausurada a Rede Basca Vermelha

18 de Março de 2004

No dia 16 de Março, o provedor de acesso ao sítio web da Rede Basca Vermelha/Basque Red Net foi cancelado sem prévio aviso, alegando a empresa canadiana umha violaçom da sua "Acceptable Use Policy".

O editor do sítio web basco dirigiu-se à empresa pedindo explicaçons sobre tam surpreendente iniciativa, recebendo a seguinte e inaudita resposta: "Basque-Red está actualmente catalogada como umha conhecida organizaçom terrorista polo Governo Canadiano, ante o qual lhe comunicamos com 72 horas de antecedência que a sua conta está a ser eliminada. Se o desejar, pode apagar e recriar a sua conta para alojar um domínio diferente. É favor no-lo comunique".

Tal e como lembrou o editor da Rede Basca Vermelha, o militante abertzale e comunista Justo de la Cueva, "A Rede Basca Vermelha integra pessoas que som comunistas bascas independentistas, feministas e ecologistas radicais, interessadas na informaçom e a comunicaçom. A maioria som bascas de nascença mas também há bascas por adscriçom ou por solidariedade internacionalista". Além disso, os tribunais de Justiça do Estado espanhol, onde mora a maioria dos membros do sítio web clausurado, nunca actuou contra ele nem contra o seu editor e fundador, nom havendo portanto qualquer sentença judicial contra a Rede Basca Vermelha, nem sequer citaçom judicial ou policial.

Como se vê estamos ante umha nova prova da degeneraçom fascistizante dos estados capitalistas, que está a varrer até a aparência dos autoproclamados Estados DE DIREITO, implantando "caça às bruxas" e "listas negras" secretas aplicadas polos governos sem processo, sem audiência dos acusados e condenados, sem intervençom judicial e sem possibilidade de defesa.

Primeira Linha em Rede quer denunciar esta manobra censora contra um espaço de liberdade na Internet, enviando toda a solidariedade aos e às camaradas da Rede Basca Vermelha e exigindo a imediata restituiçom dos direitos conculcados aos promotores e promotoras da Basque Red Net.

 

Voltar à página principal