Mobilizaçons operárias no Condado e Trasancos

15 de Setembro de 2004

A ameaça de despedimentos massivos e eliminaçom de postos de trabalho está a golpear as comarcas do Condado e Trasancos. As acçons de rua dos quadros de pessoal de Avigan (Ponte Areas) e Izar (Fene e Ferrol) estám a contar com o apoio da esquerda independentista, através de NÓS-Unidade Popular.

Em Fene e Ferrol decorreu o dia 14 a primeira manifestaçom massiva de trabalhadores e trabalhadoras dos estaleiros após a paragem do verao e frente às reticências dos comités de empresa, em luita contra a privatizaçom e reduçom de empregos para metade dos actuais. Umha representaçom de NÓS-Unidade Popular participou denunciando a política dos sindicatos e partidos espanhóis no conflito, ao se mostrarem dispostos a assumir a que poderia ser definitiva ofensiva contra um sector estratégico na economia produtiva galega. Membros da equipa de governo do PP e Independentes por Ferrol, bem como do PSOE presentes ante o paço do concelho ferrolano fôrom apupados no fim da manifestaçom.

No dia de hoje repetírom-se as acçons de protesto operárias, indo para além da domesticaçom pretendida polos representantes sindicais dos comités de empresa. A auto-estrada A9 foi cortada por grupos de manifestantes durante a manhá, provocando caos circulatório, enquanto trabalhadores ocupavam a sede da instituiçom municipal ferrolana apesar da tentativa do presidente da Cámara (Juan Juncal, do PP) de evitar a entrada das trabalhadoras e trabalhadores dos estaleiros Izar.

Também em Ponte Areas se vivem acçons de protesto do quadro de pessoal da empresa de alimentaçom Avigan, ameaçada de fechamento e despedimentos massivos de até 100 trabalhadoras. As manifestantes, entre as quais militantes independentistas de NÓS-UP da comarca, cortárom o tránsito na manhá do dia 14 na estrada N-120, sem que a dotaçom da Guarda Civil pudesse evitá-lo. Anunciárom que a luita vai continuar até que se garanta o direito ao trabalho do conjunto de trabalhadoras atingidas.

 

Voltar à página principal