Administraçom Bush, incapaz de evitar o crescimento do sentimento anti-ianque no mundo

29 de Setembro de 2004

Os Estados Unidos continuam a perder a batalha do anti-norte-americanismo junto da opiniom pública mundial, segundo reconhecem diversos relatórios internos da própria administraçom ianque difundidos por media desse país. Um relatório oficial hoje divulgado confirma tal circunstáncia, justificando-a pola "ausência de umha acçom coordenada e ambiciosa para melhor apresentar a política norte-americana".

O relatório acrescenta que "missons e estratégias díspares no ámbito das agências governamentais traduzem-se na ineficácia dos esforços de "diplomacia pública"", expressom utilizada para designar as operaçons de comunicaçom com a opiniom pública internacional, de acordo com o relatório anual apresentado por umha comissom mandatada polo Congresso norte-americano.

O documento visa principalmente o Departamento de Estado (Negócios Estrangeiros), encarregado de transmitir e explicar a mensagem de Washington, nom apenas aos governos, mas também às opinions públicas dos diferentes países. Verifica-se nele o fracasso das campanhas e investimentos milionários para vender aos povos do mundo as versons pró-ianques dos conflitos por eles provocados.

Daí que o relatório afirme abertamente que "Convém melhorar a propagaçom da mensagem americana, pois a voz do governo dos Estados Unidos está, por vezes, ausente dos media nacionais e internacionais".

De facto, diversas sondagens e inquéritos evidenciam, nos últimos anos, umha deterioraçom crescente da imagem dos Estados Unidos no mundo, em particular no mundo árabe e na Europa, tendência só aprofundada com a guerra contra o Iraque.

A Administraçom norte-americana continua a intensificar as suas operaçons de comunicaçom, sobretodo direccionadas para o mundo mussulmano, (criaçom de televisons, rádios, jornais, campanhas propagandísticas), sem conseguir, no entanto, erradicar ou sequer deter a propagaçom do fenómeno do anti-norte-americanismo.

 

Voltar à página principal