Convocado Congresso Nacional Constituinte da nova organizaçom juvenil do MLNG

12 de Outubro

O processo congressual iniciado no passado mês de Setembro por jovens provenientes de diversas entidades independentistas, junto a outr@s sem adscriçom organizativa até a altura, vai culminar no próximo dia 16 de Outubro em Ferrol, com a realizaçom do Congresso Nacional Constituinte de umha nova organizaçom juvenil independentista. Oferecemos a seguir na íntegra o comunicado remetido ao nosso Portal pola Promotora Nacional da nova entidade que ficará constituída no próximo sábado na Terra de Trasancos, sob a legenda "Direito à rebeliom".

"CONGRESSO NACIONAL CONSTITUINTE DA NOVA ORGANIZAÇOM JUVENIL DO MLNG. DIREITO À REBELIOM

Militantes de diversas estruturas do Movimento de Libertaçom Nacional Galego como AGIR, NÓS-UP e Primeira Linha, junto com jovens até agora sem organizar, iniciamos no passado mês de Setembro o processo congressual para a constituiçom de umha nova organizaçom juvenil da esquerda independentista.

Com este objectivo, configuramos umha Promotora Nacional, formada por jovens independentistas de diversas comarcas da Galiza, encarregada de coordenar e gerir o processo constituinte da nova organizaçom juvenil, que culminará no próximo 16 de Outubro com a celebraçom do Congresso Nacional Constituinte (CNC) na cidade de Ferrol sob a legenda "Direito à rebeliom".

A Promotora Nacional decidiu abrir este processo ante a renúncia oficial da AMI a ser a organizaçom unitária da mocidade do MLNG, e a constataçom de que nengumha das estruturas juvenis existentes se adapta às necessidades e reptos actuais da esquerda independentista galega.

A Promotora Nacional da nova organizaçom juvenil do MLNG manifesta a sua satisfaçom pola acolhida que está recebendo o novo projecto revolucionário da mocidade trabalhadora e popular galega, polo que as previsons com que actualmente trabalhamos converterám o CNC numha das maiores assembleias de jovens da esquerda independentista da história da Galiza contemporánea.

Embora o CNC se vaia celebrar a porta fechada, só podendo participar a militáncia e simpatizantes com acreditaçom, na tarde-noite do domingo 16 de Outubro estará na rede a página web com detalhada informaçom do desenvolvimento deste plenário, assim como dos acordos políticos, ideológicos e organizativos adoptados.

Um saúdo independentista, socialista e antipatriarcal da
Promotora Nacional

Galiza, 11 de Outubro de 2004"

 

Voltar à página principal