NÓS-UP mobiliza-se com as trabalhadoras e trabalhadores ameaçados por novas agressons patronais

17 de Agosto de 2004

A esquerda independentista galega organizada em NÓS-Unidade Popular está a tomar parte em mobilizaçons operárias em diversos pontos do País, ante a nova ofensiva patronal que tem o seu máximo expoente na nova reconversom prevista para os estaleiros de IZAR em Fene e Ferrol.

Para além da integraçom de NÓS-UP na Plataforma Galega em Defesa do Sector Naval, que já convocou umha primeira manifestaçom em Ferrol, também na comarca do Condado está a apoiar as iniciativas em solidariedade com o quadro de pessoal da empresa de alimentaçom AVIGAN, ameaçado por um despedimento massivo que poderia afectar 98 trabalhadores e trabalhadoras.

Se no caso dos estaleiros trasanqueses é o Governo espanhol do PSOE que directamente está a preparar a ofensiva final contra um sector estratégico da nossa economia nacional, com a inestimável colaboraçom do sindicalismo domesticado, no caso da empresa de Ponte Areas pretende-se efectivar umha manobra especulativa que deixe na rua quase cem pessoas e permita os patrons continuar a actividade sob outra etiqueta empresarial. Entre os promotores da operaçom encontram-se representantes municipais do PP e da UCPV, cisom da mesma direita espanhola cogovernante na Cámara municipal de Ponte Areas. Centenas de vizinhos e vizinhas manifestárom-se já nas ruas do concelho em solidariedade com o quadro de pessoal de AVIGAN.

Em ambos os casos, a nossa esquerda independentista está a participar activamente na denúncia destas agressons à classe trabalhadora galega. Pode-se aceder a mais pormenores de ambas luitas e da participaçom independentista no web nacional de NÓS-Unidade Popular.

 

Voltar à página principal