Assembleia de Mulheres do Condado organiza II Certame Literário Feminista

7 de Abril de 2005

A Assembleia de Mulheres do Condado (AMC) convocou a segunda ediçom do Certame Literário Feminista do Condado, que dá continuidade à iniciativa inaugural do passado ano, contando nesta ocasiom com o patrocínio da Cámara municipal de Mondariz, do jornal A Peneira e três livrarias de Ponte Areas. A data máxima de entrega de trabalhos é o dia 30 de Junho. Reproduzimos a seguir as bases com as restantes normas de participaçom.

Bases

1-A Assembleia de Mulheres do Condado (AMC) convoca o II Certame Literário Feminista do Condado, com o objectivo de reivindicar os direitos das mulheres e denunciar a nossa marginalizaçom e exploraçom.

2-A temática será livre sempre que esteja relacionada directa ou indirectamente com a situaçom de opressom, dominaçom e exploraçom que padecem as mulheres no actual sistema patriarcal.

3-Poderám participar todas as mulheres que o desejarem sem limites de idade.

4-Os trabalhos serám apresentados exclusivamente em língua galega.

5-O certame está aberto a qualquer género literário (romance, poesia, teatro, ensaio).

6-O júri é constituído por:
-Umha representante da organizaçom convocante, a AMC.
-Umha professora de secundário.
-Umha investigadora da história das mulheres galegas.
-Umha representante das entidades patrocinadoras.
-Umha reconhecida escritora galega.

7-O prémio estará dotado com 300 euros, podendo o júri declará-lo deserto ou dividir a quantidade citada em accesits na sua totalidade ou em parte.

8-O prazo de apresentaçom de trabalhos finaliza o dia 30 de Junho de 2005.

9-Os trabalhos serám apresentados por triplicado num envelope em que se fará constar na parte exterior o título e um pseudónimo da autora e, em envelope diferente, identificado com o título do trabalho e o seu pseudónimo, serám entregues os dados pessoais da autora: nome e apelidos, Bilhete de Identidade (BI), endereço, telefone de contacto.

Os envelopes serám enviados por correio certificado à Rua Rosalia de Castro 9, 5º direita de Ponte Areas, a nome da AMC.

10-O trabalho ou trabalhos premiados ficarám em propriedade da Assembleia de Mulheres do Condado. Embora a autora ou autoras manterám os seus direitos sobre segundas ou posteriores ediçons de ser publicado o trabalho premiado.

11-Os trabalhos nom premiados ficarám a disposiçom das autoras durante um prazo de dous meses umha vez atribuído o prémio. Após finalizar este período de tempo, serám destruídos.

12-A interpretaçom das presentes bases som atribuiçom do júri.

13-A decisom do júri é inapelável.

14-A participaçom no prémio supóm a aceitaçom das suas bases.

Assembleia de Mulheres do Condado


Ponte Areas, 5 de Abril 2005

 

Voltar à página principal