Concluiu em Salvaterra a segunda ediçom da Escola de Formaçom organizada por AGIR e BRIGA

22 de Março de 2005

Tal e como já informamos durante as últimas semanas, no último fim de semana decorria no Condado a segunda ediçom da Escola de Formaçom organizada polas entidades estudantil e juvenil independentistas, AGIR e BRIGA.

Às três jornadas de actividades formativas e lúdicas assistírom mais de meia centena de jovens independentistas procedentes de diversas comarcas da Galiza, que fôrom recebid@s pola responsável comarcal de AGIR e a responsável comarcal de NÓS-Unidade Popular na comarca do Condado.

A colaboraçom da Sociedade Cultural e Desportiva do Condado permitiu realizar um roteiro pola natureza da comarca do Sul da Galiza, contando com Manuel Soto como guia de excepçom. Os seminários de André Seoane Antelo e Carlos Morais, membros da Direcçom nacional de NÓS-UP, tratárom de diversos aspectos de teoria política e trabalho organizativo, bem como umha aproximaçom analítica à história da esquerda independentista galega por parte do segundo dos conferencistas.

A temática juvenil ocupou lugar de destaque nos debates, nomeadamente a trajectória dos últimos anos de existência de um referente unitário independentista como o que AGIR representa a nível estudantil.

As noites posteriores às jornadas de trabalho e estudo incluírom concertos em locais da vila, para já na última jornada realizar-se umha palestra, a cargo de Vreixo Formoso, da Mesa nacional de BRIGA, dedicada à segurança da actividade política na Internet, que deu lugar a perguntas e debate sobre um tema de grande importáncia na actividade política diária no nosso movimento.

Jantares de confraternizaçom, pintagens colectivas de murais e o convívio propiciado por três dias de actividades em comum servírom para completar a Escola de Formaçom '05, que sem dúvida serviu para fortalecer e enriquecer o nosso movimento juvenil independentista.

As duas entidades organizadoras, AGIR e BRIGA, pendurárom já nos seus respectivos webs amplas crónicas e reportagens fotográficas sobre a Escola de Formaçom decorrida em Salvaterra de Minho neste último fim de semana.

 

Voltar à página principal

 

 

Aspecto da sala de actos durante umha das palestras incluídas no programa da Escola de Formaçom '05
Um momento de descanso durante o roteiro guiado pola comarca do Condado