Fala Ceive reclama conteúdos berzianos nos meios de comunicaçom públicos galegos

21 de Dezembro de 2004

A associaçom cultural Fala Ceive do Berzo, com a colaboraçom da Fundaçom Via Galego, iniciárom umha campanha de procura de adesons entre a populaçom berziana para que sejam incluídos conteúdos dessa comarca na programaçom da CRTVG. A seguir reproduzimos o comunicado difundido pola citada associaçom galega.

POR UMHA RÁDIO E TELEVISOM GALEGAS MAIS BERZIANAS
Campanha demanda conteudos berzianos nos meios de comunicaçom públicos galegos

A Associaçom Cultural Fala Ceive do Berzo, junto com a Fundación Vía Galego, venhem de iniciar umha campanha de sensibilizaçom e recolha de apoios na populaçom berziana em demanda da inclusom de notícias locais e temáticas berzianas na programaçom da CRTVG.

A Televisom da Galiza e a Rádio Galega som meios de comunicaçom que os berzianos e as berzianas recebemos habitualmente nos nossos fogares, tendo no Berzo, quando menos, umha audiência similar à existente no território da Comunidade Autónoma Galega.
Sentimo-nos identificados com a programaçom destes canais pola identidade lingüística e cultural que temos com Galiza.

Para aprofundar nesses fortes vínculos com as terras oficialmente galegas, com o presente escrito queremos solicitar das instituiçonns responsáveis a incorporaçom do Berzo aos conteúdos da CRTVG.

Estaria-se também desse jeito a desenvolver a normativa relativa ao fomento e apoio da língua galega nos territórios orientais da Lei de Normalizaçom Lingüística e o Plano Geral de Normalizaçom Lingüística da Comunidade Autónoma Galega, assim como o Estatuto de Autonomia de Castela e Leom quando propugna a defesa e protecçom da nossa língua.

Assina esta demanda!
Colabora na sua difusom!

Descarrega o ficheiro com a folha de assinaturas que podes encontrar no web de Fala Ceive: www.falaceibe.tk, recolhe quantas puderes entre os teus contactos, amizades, companheiros/as, etc. e envia-o para:

Fala Ceive
Apartado dos Correios 257
24400 - Ponferrada

 

Voltar à página principal