Extrema direita venezuelana reclama em Miami a Bush eliminaçom física de Chávez

15 de Março de 2005


Num programa de televisom emitido em Miami pola extrema direita venezuelana lá instalada, umha conhecida jornalista cubana pertencente ao exílio contrarrevolucionário defendeu abertamente a intervençom ianque na Venezuela e o assassinato do seu presidente legítimo, Hugo Chávez.

Foi na passada quinta-feira que o programa "Maria Elvira Confronta" incluiu um debate entre um ex-agente da CIA participante no assassinato do Ché Guevara e um representante da reacçom venezuelana em Miami, concordando eles e a apresentadora na necessidade de que os EUA ataquem Venezuela e eliminem Hugo Chávez.

Sem qualquer reserva, e ante as cámaras de televisom, apelou-se à acçom violenta para a modificaçom do "status quo" na Venezuela, mediante a intervençom da CIA, pondo-se como exemplo o bombardeamento de Tripoli, capital da Líbia, e outras intervençons semelhantes.

A apresentadora insistiu na necessidade de garantir que o eventual ataque elimine fisicamente o presidente Chávez, ao tempo que apelava para que assim o povo venezuelano "acorde" e seja possível mudar o rumo do país, reconduzindo-o ao rego pró-imperialista.

Já durante o referendo de revogaçom, no mesmo programa da televisom de Miami foi proposto o assassinato de Hugo Chávez mediante o uso de um rifle com mira telescópica, sem que em nengum momento tenha havido nengumha intervençom para evitar os apelos públicos ao terrorismo por parte dos meios de comunicaçom ao serviço da extrema direita venezuelana e cubana.

Lembremos que o governo venezuelano leva meses a denunciar a existência de planos norte-americanos para a eliminaçom de Hugo Chávez como via para abortar a revoluçom bolivariana e retomar o controlo dos recursos económicos e direcçom política da Venezuela polo imperialismo ianque. Também Fidel Castro, alvo freqüente das conspiraçons terroristas estado-unidenses, advertiu da eventualidade de umha tentativa de assassinato do líder venezuelano.

Podes ver e ouvir um fragmento do programa televisivo em que se incita à eliminaçom de Chávez aqui.

 

Voltar à página principal