Acçom feminista no Condado: As Neves acolheu concentraçom contra as violaçons

29 de Janeiro de 2005

Convocadas pola Assembleia de Mulheres do Condado (AMC), mais de setenta mulheres secundárom a concentraçom contra o terrorismo machista realizada na manhá de hoje na vila das Neves. Umha caravana de automóveis, portando bandeiras lilás, saiu pouco depois das 11 da manhá da estaçom dos autocarros de Ponte Areas até as Neves na que foi a primeira mobilizaçom feminista realizada na história deste concelho do Condado. Às 12 horas, decorria a anunciada concentraçom que a AMC convocou no quadro da sua intensa campanha contra José Luís Estévez Rodríguez, um vizinho das Neves acusado de violar várias menores.

Entre as participantes, estavam Rosa Maria e Vanessa, asssim como familiares de moças agredidas. "Rosa e Vanessa somos todas", "José Luís, imos por ti", "Nengumha violaçom sem resposta!", fôrom algumhas das palavras de ordem que o feminismo organizado do Condado empregou para denunciar as agressons e violaçons. Bandeiras lilás e da nossa Pátria acompanhavam as reivindicaçons feministas, entre a expectaçom da vizinhança e umha discreta vigiláncia da Guarda Civil.

A concentraçom finalizou com a intervençom de Lorena Alonso que, em representaçom da AMC, deu leitura ao manifesto que reproduzimos integramente.

Posteriormente, o conjunto das concentradas ocupou com a faixa da AMC e bandeiras o salom de plenos da cámara municipal, onde estava a realizar-se um pleno ordinário. Após mais de meia hora de pressons, o presidente da cámara acedeu à solicitaçom que Íria Medranho, em representçom da AMC, apresentou ao Governo municipal. Assim, no ponto de rogos e questons, acrescentou-se umha série de demandas que fôrom adoptadas por unanimidade. O Concelho das Neves facilitará ajuda económica às duas moças que denunciárom José Luís Estévez Rodríguez para dar cobertura jurídica e assumir os gastos derivados das denúncias. A notificaçom deste acordo será enviada à AMC e às duas raparigas agredidas.

Para concluir a jornada de luita feminista contra as agressons machistas, a AMC organizou num restaurante de Ponte Areas um jantar de confraternizaçom a que assistírom Rosa, Vanessa e as suas respectivas maes.

 

:: Mais informaçons sobre o mesmo tema

- Assembleia de Mulheres do Condado convoca concentraçom contra as violaçons nas Neves (+...)

- Assembleia de Mulheres do Condado denuncia impunidade do violador das Neves (+...)

 

Voltar à página principal