Contra a repressom e o sectarismo, pola solidariedade obreira. Artigo assinado polos seis independentistas acusados de agressom a Juan Fernández
10 de Março de 2005
Coincidindo com o Dia da Classe Obreira Galega, os seis independentistas e filiados da CIG acusados de agressom ao vice-presidente da Cámara de Ferrol, Juan Fernández, figérom público um escrito em que denunciam nom só a montagem que envolve o caso, como também a posiçom sectária do secretário comarcal da CIG em Trasancos. Reproduzimos o conteúdo do artigo.
Contra a repressom
e o sectarismo. Pola solidariedade obreira
No passado dia
26 de Setembro de 2004, umha grande manifestaçom convocada polos principais
sindicatos percorreu as ruas de Ferrol em defesa do sector naval galego e
dos postos de trabalho ameaçados em IZAR Fene e IZAR Ferrol. No final
da mobilizaçom, a presença do empresário naval, líder
de IF e vice-presidente da Cámara municipal de Ferrol, Juan Fernández,
foi contestada por um sector de manifestantes, recebendo o impacto de alguns
ovos. O político e empresário nom demorou a sair nos meios de
comunicaçom culpabilizando a CIG pola resposta que recebeu a sua presença
no final da multitudinária manifestaçom, sem que ninguém
desse crédito aos já habituais delírios do político
populista e reaccionário.
Porém,
transcorridos cinco meses, seis filiados da CIG na comarca de Trasancos, todos
nós militantes independentistas, recebemos umha denúncia do
filho de Juan Fernández por umhas supostas "lesons". A disparatada
denúncia afecta também umha sétima pessoa que nem sequer
participou na citada manifestaçom, o que pom em evidência o carácter
arbitrário de umha acçom legal instigada directamente pola chamada
"brigada de informaçom" da Polícia espanhola em Ferrol.
O julgamento,
que ia realizar-se no passado dia 25 de Fevereiro, foi finalmente adiado ao
ser apresentada umha segunda denúncia polo próprio Juan Fernández,
o que poderá levar a que enfrentemos um julgamento por um delito de
agressom ou similar, simplesmente por termos participado numha manifestaçom
em apoio ao sector naval público galego. Nom tendo participado nengum
de nós em nengumha agressom, nem existindo portanto nengumha prova
que justifique a acusaçom, bastou que a Polícia espanhola utilizasse
a "lista negra" de militantes independentistas na comarca para que
se activasse um processo repressivo que nom sabemos onde pode acabar.
Porém,
a sucessom de despropósitos nom acaba por aí. Na véspera
do julgamento de 25 de Fevereiro, ante o pedido de solidariedade dirigido
pessoalmente ao secretário comarcal da CIG pola nossa parte, "Milocho"
nega-se a que a nossa central poda dar qualquer apoio à nossa defesa
e mesmo a fazer público um posicionamento de solidariedade. Em opiniom
de "Milocho", a nossa filiaçom independentista e o facto
de fazermos parte do cortejo de NÓS-Unidade Popular na citada manifestaçom
impossibilita qualquer acçom solidária por parte da central
a que pertencemos.
Nom é
a primeira vez que dirigentes da CIG ligados ao BNG aplicam medidas sectárias
e insolidárias a companheiros e companheiras em funçom da sua
militáncia política. O critério é para alguns
desses dirigentes sindicais "todo o apoio, cobertura e colaboraçom
para a filiaçom politicamente adscrita ao BNG, e toda a desconfiança
e desprezo para "os outros", chegando ao ponto de assumir neste
caso umha acusaçom implícita: "se os acusam, por algo será…".
Pola nossa parte, nom queremos renunciar à solidariedade da nossa central sindical, por mais que o seu máximo representante na comarca nos tenha virado as costas. E, quanto à burda campanha policial e à arbitrária denúncia de Juan Fernández, confirmamos-lhes publicamente que nom conseguirám que renunciemos a manifestar-nos nas nossas ruas em defesa dos direitos da nossa classe.
Assinam este
texto:
Maurício
Castro Lopes, Ernesto Lopes Dias, Bruno Lopes Teixeiro, Jaime Mosqueira Moure,
Manuel Ponce Rodrigues e Paulo Rico Painceiras, filiados da CIG e militantes
independentistas.
:: Mais informaçons sobre o mesmo tema
- Adiado julgamento a seis filiados trasanqueses de NÓS-Unidade Popular (+...)
- NÓS-UP denuncia em conferência de imprensa processos repressivos contra a esquerda independentista (+...)
- NÓS-Unidade Popular denuncia umha nova montagem policial contra a militáncia independentista em Ferrol (+...)
- Dezenas de milhares em defesa do emprego em Ferrol (+...)
- NÓS-UP anuncia que participará na mobilizaçom de domingo em Ferrol, denunciando o colaboracionismo entre as direcçons sindicais, PP e PSOE (+...)
- AGIR adere à manifestaçom em defesa da construçom naval pública (+...)
- Mobilizaçons operárias no Condado e Trasancos (+...)
- PP, PSOE, IF, BNG e IU condenam conjuntamente a reacçom d@s operári@s de IZAR frente à provocaçom de Juan Fernández (+...)
- O tenente de alcaide de Ferrol paga a sua prepotência ante trabalhadoras/es de IZAR (+...)