Festival eumês de Treme a Terra atinge X ediçom

11 de Janeiro de 2005

Cumpre-se a décima ediçom do Festival Treme a Terra, organizado pola associaçom do mesmo nome na vila de Pontedeume, na comarca do Eume. Durante a última década, o evento tem sido dedicado a diversas temáticas de tipo internacionalista e social, dando especial protagonismo a grupos musicais galegos que só através de festivais como este conseguem desenvolver a sua actividade num país em que as instituiçons públicas apostam normalmente por opçons alheias, nomeadamente espanholas.

Nesta ocasiom, as actividades relacionadas com o festival começárom no dia 7 com umha conferência sobre o desmantelamento industrial no naval de Trasancos, com a participaçom do secretário nacional de organizaçom do Metal da CIG, António Lopes. Ontem inaugurárom-se três exposiçons dedicadas aos dez anos de Treme a Terra, às luitas do sector naval galego nos anos 80 e às mobilizaçons de 2004 nos estaleleiros trasanqueses. As exposiçons manterám-se até o dia 6 de Fevereiro na sede da Cámara municipal.

E já no dia 14 de Janeiro, sexta-feira, polas 21.30 horas, decorrerá o acto central desta X ediçom, com o concerto Treme a Terra, em que participarám diversos grupos da zona e doutras comarcas da Galiza. A entrada é livre e o lugar é o do costume, em frente à bomba de gasolina, na vila de Pontedeume.

 

Voltar à página principal