NÓS-Unidade Popular convoca Dia da Galiza Combatente com um acto político em Carral

3 de Outubro de 2005

NÓS-Unidade Popular comemora por quinto ano consecutivo o Dia da Galiza Combatente, em que se lembra a morte d@s militantes do EGPGC Lola Castro e José vilar a 11 de Outubro de 1990 e, através deles, a Galiza luitadora em defesa dos direitos nacionais e sociais. Se nas ediçons anteriores a data foi convocada em Culheredo, Ponte Vedra, Ferrol e Vigo, desta vez a vila de Carral será o lugar em que NÓS-UP realize um acto político sob a legenda "Galiza por umha política de esquerda".

O acto político decorrerá sábado 8 de Outubro, à 1 da tarde, ante o monumento aos Mártires de Carral e, segundo a organizaçom independentista informa no seu web, servirá para apresentar as linhas mestras do trabalho político para os próximos meses, contando com a intervençom de representantes da Assembleia Comarcal da Corunha e da Direcçom Nacional.

Previamente, haverá umha oferenda floral e um recital poético ante o monumento aos Mártires de Carral, em homenagem aos protagonistas do levantamento progressista e nacional de 1846. Finalmente, haverá um jantar de confraternizaçom das pessoas assistentes.

Toda a informaçom sobre a jornada pode ser consultada no web de NÓS-UP.

 

Voltar à página principal