"10 anos de imprensa comunista galega", novidade da Abrente Editora

22 de Dezembro de 2005

Como preámbulo ao iminente cumprimento da primeira década de vida do nosso partido, a Abrente Editora acabou de publicar um novo volume sob o título "10 anos de imprensa comunista galega. Selecçom de artigos do Abrente 1996-2006". A obra comemora o aniversário do órgao de expressom trimestral de Primeira Linha, que desde 1996 tem cumprido pontualmente a cita com um crescente sector do movimento popular galego, convertendo-se na mais veterana publicaçom periódica independentista galega em activo.

Com tal motivo, a editora do nosso partido apresenta umha colectánea de artigos publicados durante estes dez anos no Abrente. Som, ao todo, 26 trabalhos de 17 autoras e autores galegos e estrangeiros: Ana Barradas, Maurício Castro, Noélia Fernandes Marquês, Domingos A. Garcia Fernandes, Iñaki Gil de San Vicente, George Labica, Celso X. Lopes-Paços, Berta Lopes Permui, Michael Löwy, Francisco Martins Rodrigues, Carlos Morais, Dionísio Pereira, Alexandre Peres, Santiago Prol, Noa Rios Bergantinhos, Francisco Sampedro e André Seoane Antelo.

Temas da história do movimento operário na Galiza, feministas, ambientalistas, de teoria marxista, defesa da língua, arte, estudos de diversas experiências e figuras revolucionárias internacionais. Umha ocasiom para aceder a umha série de textos em muitos casos recuperados de números já esgotados do Abrente, e de ler através deles um pouco da história mais recente da Galiza com a perspectiva nom unicamente da nossa militáncia comunista e independentista, mas também de outros autores e autoras galegas de esquerda, além de qualificados representantes de outros povos do mundo.

10 anos de imprensa comunista galega. Selecçom de artigos do Abrente 1996-2006. VVAA, Compostela, Galiza, Dezembro de 2005. 217 páginas. 18 euros. Podes informar-te sobre os trámites para fazer a tua encomenda na secçom da Abrente Editora do nosso portal.

 

Voltar à página principal

 

 

Capa do novo livro publicado pola editora do nosso partido. Clica sobre ela para a veres aumentada