Pintam de cor-de-rosa a casa natal de Franco e eliminam placa de mármore com o seu retrato da fachada. Quatro detidos

20 de Novembro de 2005

NÓS-Unidade Popular deu hoje continuidade à sua campanha contra a simbologia fascista com umha espectacular acçom em pleno centro de Ferrol. Foi ao meio-dia e com convocatória prévia aos meios de comunicaçom, para deixar claro que se tratava de uma acto público de denúncia da sobrevivência de símbolos do franquismo no nosso país.

Enquanto um grupo de pessoas se concentrava na rua com umha faixa reclamando "simbologia fascista fora da Galiza", quatro independentistas subírom à varanda vestidos com fatos de trabalho e pintárom a fachada da cor-de-rosa, que nos últimos anos identifica a luita contra os símbolos fascistas na Galiza.

Umha placa de mármore preto de grandes dimensons, com um retrato de Franco e frases apologéticas do franquismo, foi arrancada da fachada e lançada contra o chao da rua, ficando esnaquiçada. Numerosos veículos e efectivos policiais enchêrom a rua cortárom o tránsito, enquanto as pessoas concentradas aplaudiam a acçom antifascista.

Os quatro independentistas que realizárom a acçom antifascista na casa natal de Franco fôrom finalmente detidos e conduzidos à esquadra policial de Ferrol, onde continuam detidos segundo as últimas informaçons com que contamos. Um grupo de companheir@s esperam às portas notícias sobre o estado dos detidos e reclamam a sua imediata liberdade, pedido ao qual nós aderimos.

Lembremos que NÓS-UP desenvolve nas últimas semanas umha campanha a nível nacional sob a citada legenda. Durante a campanha, fôrom realizadas várias iniciativas institucionais dirigidas à Junta da Galiza e a diversas cámaras municipais, a de Ferrol incluída. A falta de resposta das instituiçons às propostas da esquerda independentista provoca mais umha vez que a acçom directa substitua o que devia ser actuaçom ordinária da Junta da Galiza e dos governos municipais autodenominados "democráticos".

Nas próximas horas informaremos da evoluçom dos acontecimentos de hoje, ao tempo que recomendamos visitar o web nacional de NÓS-UP, onde está toda a informaçom e umha ampla reportagem fotográfica da mobilizaçom antifascista de Ferrol.

 

Voltar à página principal

 

 

Imagem da acçom antifascista de hoje em Ferrol
Nom é a primeira vez que a esquerda independentista recorre à acçom directa para denunciar a presença de símbolos fascistas na Galiza
Ferrol, Novembro de 2000. Estátua eqüestre de Franco é totalmente pintada de cor-de-rosa por militantes independentistas
Narom, Dezembro de 2003. Militantes de NÓS-UP derrubam a golpe de maça estátua de Franco no concelho de Narom