AGIR cumpre cinco anos

26 de Setembro de 2005

Em Setembro de 2000 culminava a unificaçom de diversos sectores estudantis independentistas na nova entidade unitária, AGIR, que nestes anos tem participado activamente em todas as luitas do estudantado galego por um sistema educativo galego, público, democrático e nom patriarcal. Coincidindo com este quinto aniversário, reproduzimos na íntegra o comunicado feito público pola organizaçom estudantil independentista, aproveitando a ocasiom para enviar os nossos parabéns a todas as estudantes e todos os estudantes que desde aquela data tenhem trabalhado por construir um forte movimento estudantil revolucionário e independentista na Galiza.

"Cumprimos cinco anos de andaina organizativa

No mês de Setembro de 2005, AGIR, organizaçom estudantil da esquerda independentista, cumpre cinco anos. Queremos, através deste comunicado, partilhar esta efeméride com o conjunto de pessoas que algum dia figérom parte deste projecto, e com aquelas que dalgum modo contribuírom a lançá-lo e espalhá-lo polo país.

Os dias 19 e 20 de Setembro do ano 2000, constituía-se numha aula da Faculdade de Arte, Geografia e História de Compostela um colectivo no que confluiam as angueiras de quatro organizaçons e diversas pessoas que na altura aderírom de jeito particular à esperanzadora inflexom do associacionismo estudantil.

Quem hoje integramos AGIR, sabemo-nos receitoras e receitores dumha breve jeira de trabalho, umha breve experiência incardinada, com todo, num historial de actividade popular que, perdendo-se no horizonte do nosso passado nacional, evidencia as arelas emancipatórias que o estudantado galego, já em tempos lonjanos, soubo recrear. Sabemo-nos asemade umha peça chave na conformaçom do movimento de libertaçom nacional, assegurando entra a mocidade estudantil umha via de saída organizada às necessidades próprias, desde coordenadas inconfundivelmente nacionais e de esquerdas. Fazemos força, pois, com quem noutros sectores da realidade galega estabelecem critérios de luita semelhantes, ideados para albiscarmos junt@s a Galiza que queremos.

Comemoramos hoje um lustro de andaina, no qual expandimos criativamente o assemblearismo que alimentou o nosso caminho. Umha etapa na que dúzias de jovens galeg@s tornárom a maina realidade sob a que nos querem fazer crer que vivemos, em jornadas de luita e agitaçom, cujos resultados se projectárom em ruas, aulas, faculdades, centros de ensino do país..., e o que é mais importante, na irreverente consciência oculta dum estudantado drogado com fábulas e adormecido com a acrítica aceitaçom da cotidianeidade do contorno.

Com a lembrança das metas alcançadas e os projectos encetados; das luitas partilhadas e as arelas cobiçadas, reafirmamos o nosso compromisso com aqueles princípios e objectivos que um dia nos dérom razom de ser, razom de agir.

Cinco anos depois, continuamos a travesia com os fôlegos de antano. AGIR segue a ser o nome sob o que se acubilha a juventude combativa por um ensino digno para um futuro livre.

Viva o quinto aniversário de AGIR!!
Por um ensino galego, público, nom patriarcal, democrático e de qualidade!!
Adiante a luita estudantil!!
"

 

Voltar à página principal