NÓS-UP demonstra em Ponte Areas insalubridade de fontes sob responsabilidade municipal
30 de Abril de 2005
Representantes de NÓS-Unidade Popular apresentárom em conferência de imprensa pública a documentaçom que demonstra a responsabilidade do Governo municipal de Ponte Areas em relaçom com os casos de problemas intestinais provocados polo consumo de água das fontes públicas da vila.
Ante a ocorrência de diversos problemas de saúde em vizinhos e vizinhas de Ponte Areas, logo começárom as suspeitas de poderem ter a sua origem no consumo de água nom potável nas fontes públicas, teoricamente controladas pola instituiçom municipal.
NÓS-Unidade Popular insistiu nos últimos tempos na necessidade de garantir um controlo efectivo da qualidade das águas, tendo havido recentes actividades relacionadas com a construçom nas redondezas das áreas em que se encontram as fontes da vila do Condado.
Ante o desleixo continuado da equipa de Governo da direita e extrema direita presidida por Salvador Gonçalvez Solha, a própria NÓS-Unidade Popular tomou a iniciativa de encomendar a umha equipa técnica a análise das águas. O resultado demonstrou a contaminaçom da fonte da rua de Abaixo por "infinitas coliformes", segundo afirma o diagnóstico técnico.
Além de
apresentar as provas, NÓS-UP exigiu a demissom de Salvador Gonçalvez
Solha, ante o evidente "desleixo para com a saúde pública,
negligência e temeridade no exercício do Governo municipal".
Ao mesmo tempo, a organizaçom da esquerda independentista reclama mais
umha vez a adopçom de medidas para solucionar um importante problema
para a saúde pública como é a contaminaçom de
águas que estám a ser consumidas pola populaçom, tendo
que ser NÓS-UP quem acabasse por demonstrá-lo ante o desinteresse
do Governo do PP e UCPA.