NÓS-Unidade Popular avalia jornada repressiva de ontem, saldada com umha dezena de detençons em Lugo, Ourense, Vigo e Compostela

15 de Novembro de 2005

Umha vez concluída umha nova jornada de detençons contra militantes independentistas galegos, no que nos últimos meses está quase a se converter num hábito das forças repressivas espanholas, NÓS-Unidade Popular emitiu um segundo comunicado de imprensa para avaliar o acontecido e mostrar sem nengum tipo de ocultaçom a posiçom da esquerda independentista.

O texto difundido pola Direcçom Nacional de NÓS-UP começa por reclamar que as dez detençons de ontem sirvam de "motivo de reflexom sobre o lamentável estado de saúde democrática existente no nosso país e o custo que nele pode chegar a ter exercer direitos como a liberdade de expressom ou associaçom".

A seguir, a organizaçom independentista reafirma-se na "aplicaçom do princípio de solidariedade com aqueles e aquelas que vem espezinhados os seus direitos fundamentais de maneira tam implacável", "em lugar de qualquer consideraçom política em chave partidista".

NÓS-Unidade Popular estende no seu comunicado a solidariedade nom apenas à AMI, como também aos três centros sociais agredidos como parte do operativo da Guarda Civil: A Revolta de Vigo, A Esmorga de Ourense e O Pichel de Compostela, afirmando que "A ruidosa irrupçom em dependências de entidades socioculturais como as citadas, comprometidas dia a dia num enorme labor de dignificaçom da nossa língua e a nossa cultura nacionais, quijo situar no alvo repressivo essa actividade associativa de um dos mais sectores mais saudáveis do nosso movimento popular".

Finalmente, o comunicado apela ao Governo autonómico para que pida explicaçons "às autoridades políticas e judiciais do Estado espanhol", reiterando a exigência do respeito pola integraidade pessoal das pessoas detidas e polo seu direito a permanecerem em território galego, "enfrentando umhas acusaçons que, polo que até agora se sabe, nom passam de campanha difamatória e caça às bruxas".

Podes ler o comunicado na íntegra no web de NÓS-Unidade Popular.


:: Mais informaçons sobre o mesmo tema

Centro Social O Pichel, de Compostela, denuncia "circo mediático de passa-montanhas e pistoleiros" (+...)

Confirmada detençom de oito independentistas. NÓS-UP denuncia actuaçom repressiva (+...)


Voltar à página principal

 

 

Mais umha imagem da operaçom da Guarda Civil contra militantes independentistas ao longo do dia de ontem