Propostas de Fala Ceive aos partidos galegos

9 de Junho de 2005

A associaçom cultural berziana Fala Ceive publicou umha série de "apontamentos" dirigidos aos partidos galegos que se apresentam às eleiçons de 19 de Junho, todos eles em favor da difusom da nossa língua nessa comarca.

Entre as propostas, salienta o pedido de um "maior compromisso no apoio activo à protecçom e mais o fomento da língua galega no Berzo", que se deveria verificar numha eventual reforma estatutária fazendo constar os territórios concretos da faixa leste excluídos do actual estatuto, com umhas necessidades específicas que até hoje nengum dos partidos maioritários reconheceu.

Lembremos que todas as propostas estatutárias que actualmente há sobre a mesa ficam por trás das aspiraçons do estatuto de 36, que admitia a possível reintegraçom da Galiza chamada Irredenta, assumindo as do PSOE e BNG a actual configuraçom da Galiza como entidade mutilada pola Constituiçom e o Estatuto actuais.

A defesa da unidade lingüística é outra reclamaçom de Fala Ceive, bem como a superaçom dos entraves administrativos e alargamento dos relacionamentos com os organismos institucionais berzianos e das restantes comarcas galegas sob administraçom asturiana e castelhano-leonesa.

Finalmente Fala Ceive pede que se exclua qualque possibilidade de pactuar com o leonesismo político (Unión del Pueblo Leonés), ante a "irracional campanha antigalega" que protagoniza nos últimos tempos, de claro conteúdo racista contra o povo galego e negadora da identidade galega de territorios como o Berzo, a Seabra e as Portelas.

 

Voltar à página principal