Iniciativas pola língua: A Gentalha do Pichel organiza em Compostela A Festa do Dezassete

9 de Maio de 2005

A Gentalha do Pichel, associaçom cultural compostelana integrada na Coordenadora de Centros Sociais, organiza A Festa do Dezassete (que se fai o 14) para festejar o Dia das Letras. Será na praça compostelana de Maçarelos e incluirá um Concerto pola Língua a partir das 10 da noite.

Trata-se do segundo ano consecutivo que a citada entidade cultural promove umha festa semelhante, enquadrada nos actos que durante este mês reivindicam os direitos lingüísticos das galegas e os galegos. A Festa começa polas cinco horas da tarde do sábado 14 de Maio e contará com espectáculo teatral a cargo de Esmorganas, Grupo de Teatro Feminista da Assembleia de Mulheres do Local Social A Esmorga. Umha hora depois, às 18 horas, iniciarám-se as actuaçons musicais com A Quadrilha da Marola desde a Terra de Trasancos, o compostelano Grupo de Gaitas de Brincadeira e A Requinta da Laxeira, da Ulha. Para acabar a primeira parte da festa, a partir das 8 da tarde haverá umha Foliada com a participaçom de componentes do Quarteto da Gentalha, Os Estalotes e Baralhete.

E já na noite do sábado 14, às 22 horas, realizará-se o Concerto pola Língua na mesma Praça de Maçarelos. Os grupos participantes som: Os Tres Trebóns (e o vendaval do Rosal) com Xurxo Souto à frente; o punk-rock festeiro e reivindicativo de umha formaçom formada lá no 1991 no bairro viguês de Cóia e que já tem editado cinco discos: Skacha; e por último umha das últimas revelaçons no panorama musical galego, o grupo ourensano Lamatumbá, que apresenta o seu disco "Lume (para que saia o sol)". A Gentalha do Pichel vai habilitar um balcom onde poder refrigerar-se com preços realmente populares.

A Gentalha do Pichel aproveita o ensejo para chamar à participaçon cidadá na manifestaçom nacional que sairá da Alameda no dia seguinte, Domingo 15, às 13 horas, e que percorrerá as ruas de Compostela sob a legenda "Na Galiza vamos viver em galego". Ainda no dia a seguir, 16 de Maio, às 10 da noite, decorrerá umha ceia popular pola língua no Centro Social da Gentalha do Pichel, sito na rua Santa Clara número 21. Para acabar as actividades deste ano, o dia 17 às 6 da tarde realizará-se um mural na rua Santa Clara com a legenda: Compostela, 100% EM GALEGO.

Como se vê, cada vez som mais as iniciativas populares de todo o tipo que tentam vencer a resignaçom reivindicando a recuperaçom do pulso da luita pola língua. Nengum galego, nengumha galega consciente, deve ficar à margem deste ressurgir. A causa merece-o.

 

:: Mais informaçons sobre o mesmo tema

- Domingo 15 de Maio: manifestaçom nacional por um verdadeiro Plano de Normalizaçom Lingüística (+...)

- Nona ediçom das Jornadas Independentistas Galegas, dedicadas ao tema "Língua e Construçom Nacional" (+...)

 

Voltar à página principal