NÓS-UP adere à mobilizaçom de Ourense e reclama "umha nova política florestal"

1 de Outubro de 2005

Ante a sistemática censura que a maior parte dos meios aplica ao nosso independentismo, NÓS-Unidade Popular informa novamente de maneira directa através do seu web nacional da sua adesom à manifestaçom convocada para hoje, sábado dia 1 de Outubro, na cidade de Ourense e a partir das 20 horas, sob o mote "lumes nunca mais".

NÓS-UP afirma que na manifestaçom convocada polo Comité de Defesa do Monte Galego haverá cortejo independentista, que marchará atrás de umha faixa com a legenda "Por umha nova política florestal". Lembrando as 50.000 hectares queimadas neste ano em mais de 10.000 incêndios, a esquerda independentista reclamará soluçons bem concretas para deter o desastre ambiental dos fogos florestais.

Para já, salienta-se como fundamental conseguir umha legislaçom que evite que a madeira queimada continue a servir para fazer negócio, do mesmo jeito que os terrenos devem deixar de alimentar "interesses urbanísticos, madeireiros, gadeiros ou cinegéticos".

A destruiçom e despovoaçom do meio rural e a conseguinte perda de valor económico e social do rural galego som também apontados como causas do abandono dos montes, que favorece igualmente a extensom de fogos e a falta de controlo e prevençom de incêndios. Nesse sentido, NÓS-UP afirma que "o monte convertido em mera fonte de recursos para a indústria madeireira enche-se de eucaliptos e outras espécies foráneas de maior rendibilidade económica que favorecem a apariçom e extensom dos incêncios, dificultam a luita contra eles e degradam o rico e produtivo solo do nosso país. As instituiçons autonómicas devem tomar as medidas pertinentes para encetar a eliminaçom deste tipo de flora e iniciar a regeneraçom dos nossos castigados espaços naturais com espécies autóctones".

Em definitivo, NÓS-Unidade Popular propom umha verdadeira e radical mudança na política floresal ao novo Governo, como base para um combate efectivo aos incêndios. Podes ler o comunicado independentista no seu web nacional.

 

:: Mais informaçons sobre o mesmo tema

Manifestaçom nacional reivindicará em Ourense "lumes nunca mais" (+...)

 

Voltar à página principal