BNG cede à pressom mediática e renuncia à difusom da palavra "Galiza" nas camisolas da selecçom de futebol
15 de Outubro de 2005
No passado mês de Setembro, diversos meios de comunicaçom publicárom umha informaçom segundo a qual a selecçom galega de futebol que debutará em Dezembro levaria impresso no uniforme o nome galego da nossa naçom: Galiza. Em concreto, a conselheira da Cultura e os Desportos, Ángela Bugalho, afirmou que essa era umha das "premissas" do desenho em que se estava a trabalhar.
Finalmente, quando nesta semana foi apresentado o desenho final das camisolas, "Galiza" nom apareceu e no seu lugar aparece, nas costas, um texto com a legenda "selección galega". Todo indica que o BNG, responsável pola Conselharia da Cultura, cedeu à campanha mediática dirigida principalmente polo jornal "La Voz de Galicia" contra o nome do País e a identidade galega no seu conjunto.
Em lugar de reconhecer a vergonhosa renúncia, o secretário geral dos Desportos, Santiago Domingues, afirma agora que "nunca dixemos que se ía incluir o rótulo de Galiza". O alto cargo do BNG tentou justificar a renúncia dizendo que "para qualquer que saiba de futebol, é claro que as camisolas nom levam o nome do país". Na realidade, há casos da utilizaçom do nome do país na parte frontal da camisola, em selecçons como a mexicana ou a norte-americana, por exemplo.
Do que nom há precedentes conhecidos é do uso da legenda "selección galega" nas costas, opçom final escolhida por Santiago Domingues e Ángela Bugalho. Em todo o caso, e para além das opçons de outros países com os seus nomes já normalizados, a difusom de "Galiza" nas camisolas da nossa selecçom de futebol significaria um grande labor de normalizaçom num ámbito tam de massas como o futebol profissional.
A marcha atrás
do BNG neste tema, em que historicamente sim tem feito um labor positivo,
tem mais gravidade ao ser percebido como submissa resposta à campanha
de insultos e ridicularizaçons contra a nossa língua e identidade
por parte de La Voz de Galicia. Os autonomistas transmitem a mensagem de extrema
fraqueza e falta de convicçons com indignas cedências como esta.
:: Mais informaçons sobre o mesmo tema
"La Voz de Galicia", em ofensiva contra a Galiza. (+...)
NÓS-UP propom ao Governo autónomo a oficializaçom de "Galiza" como nome da Comunidade Autónoma (+...)