Confirma-se responsabilidade patronal na morte de quatro operári@s em Ferrol

13 de Maio de 2005

A pesquisa das circunstáncias que envolvêrom a morte de três trabalhadores e umha trabalhadora no estaleiro de Navantia em Ferrol confirma o que a esquerda independentista e alguns sectores sindicais venhem denunciando há tempos: as empresas auxiliares do estaleiro público nom garantem a mínima segurança aos seus operários e operárias, como parte das condiçons draconianas de precariedade que padecem. Os acidentes e mortes nom som portanto umha questom de azar, senom a conseqüência inevitável da estratégia empresarial de conseguir o máximo lucro com o mínimo investimento.

Assim, no caso do envenenamento d@s quatro obreir@s em Ferrol, o incumprimento das mais mínimas medidas preventivas foi flagrante. O relatório da pesquisa de urgência afirma que nom houvo qualquer pedido de mediçom de gases dentro do tanque em que @s empregad@s morrêrom, como correspondia após a soldadura do dia anterior.

Além do mais, o facto de tratar-se de pessoal contratado eventualmente e em condiçons precárias, impede que poda chegar-se a umha formaçom em prevençom de riscos laborais que evite casos como os que continuamente se repetem. No caso das empresas auxiliares do sector naval, a precariedade atinge níveis extremos, agravada polas pressas e precipitaçons com que som atendidos os trabalhos.

Como sempre acontece nesta matéria, todo indica que a seguir às jornadas de luto e visitas de autoridades, as responsabilidades serám esquecidas e a impunidade empresarial continuará a alimentar a sinistralidade laboral na Galiza, cujos níveis se resumem num dado contundente: um galego ou galega mort@ cada três dias num acidente no posto de trabalho.

NÓS-Unidade Popular emitiu em Ferrol um comunicado avaliando os factos, em que sublinha a necessidade de acabar com essa impunidade e critica a hipocrisia dos discursos vácuos com que as instituiçons ocultam a trágica realidade do terrorismo patronal. O comunicado pode ser consultado no web nacional de NÓS-UP.

 

:: Mais informaçons sobre o mesmo tema

Outros três trabalhadores e umha trabalhadora morrem no posto de trabalho nos estaleiros de Ferrol (+...)

Jovem operário naval morre nos estaleiros de Ferrol (+...)

 

Voltar à página principal