Comarca de Trasancos já conta com umha rádio livre e comunitária

13 de Outubro de 2005

Ontem começou a emitir Rádio Filispim, umha nova emissora livre e comunitária auto-gerida polo colectivo Opaí, promotor desta iniciativa popular. Umha grande notícia para o direito de expressom e a auto-organizaçom do movimento popular na comarca de Trasancos, que servirá para dar voz a tantas iniciativas sociais silenciadas polos media do sistema.

Colectivos de todo o tipo realizarám programas sobre temas ambientais, culturais, contra-informativos, etc, no que é umha iniciativa plural que se construiu nos últimos dous anos com todo o tipo de actividades para garantir o autofinanciamento e mediante umha estrutura assemblear.

A emissora está a soar já, com 24 horas ininterrompidas de actividade, que incluem música principalmente galega e programas diversos emitidos às tardes e noites ao longo de toda a semana.

Damos daqui os nossos parabéns ao colectivo promotor desta valiosa iniciativa, que pode colaborar no fortalecimento do movimento popular e da construçom nacional a partir da base. Para tal, é necessário que o que hoje é uso maioritário do galego se converta em língua própria de toda a grelha de programaçom, sendo este um dos aspectos "fracos" deste projecto tam necessário como digno de ser imitado noutras comarcas da naçom.

Visita o web de Rádio Filispim e, se morares em Trasancos ou nas comarcas vizinhas, podes escuitá-la já no 93.0 de FM.

 

Voltar à página principal