Manifestaçom nacional reivindicará "lumes nunca mais"

29 de Setembro de 2005

No próximo sábado, dia 1 de Outubro, Ourense acolherá a partir das 20 horas umha manifestaçom convocada polo Comité de Defesa do Monte Galego, para reclamar umha nova política florestal de prevençom e luita contra os incêndios que cada ano arrasam mais e mais hectares de monte na nossa naçom.

O Comité convocante lembra que a média de incidência dos fogos florestais é na Galiza entre oito e doze vezes superior à média do Estado espanhol, apesar de se tratar de um país húmido. A erosom do solo, a destruiçom da fauna e flora, deterioraçom da paisagem, efeito na mudança climática global e os prejuízos económicos som citados como graves conseqüências de um problema que as instituiçons nom atalhárom até hoje.

De facto, a Galiza representa apenas 7,7% da superfície florestal do Estado, e entre 1991 e 2004 registou 52,4% dos incêndios do conjunto estatal, ardendo cada ano entre 18% e 40,14% da superfície total queimada no Estado espanhol.

Os dados apresentados polas entidades convocantes som contundentes, e exigem umha resposta popular à altura da agressom que um problema de semelhantes dimensons representa.

É por isso que toda iniciativa mobilizadora deve ser apoiada, incidindo na necessidade de dar continuidade às iniciativas de auto-organizaçom popular em defesa dos recursos naturais e de um outro modelo socioeconómico alternativo ao que o capitalismo espanhol nos impom.

Lumes nunca mais!

 

Voltar à página principal