Petrocaribe: iniciativa bolivariana para a integraçom regional das Caraíbas

9 de Setembro de 2005

Umha cimeira de governos da área das Caraíbas na Jamaica serviu para combinar os primeiros passos da nova aliança criada no passado dia 29 de Junho em volta da proposta venezuelana para a venda de petróleo em condiçons preferentes a países da área. O projecto, denominado Petrocaribe, agrupa oficialmente a Venezuela, Antígua e Barbuda, Bahamas, Belize, Cuba, Dominica, Granada, Guiana, Jamaica, Santa Lucía, Sam Cristóvao e Névis, Sam Vicente e Granadinas, Suriname e República Dominicana.

A iniciativa é vista por Hugo Chávez como "coluna vertebral da integraçom", igualitária e com conteúdo social, frente ao modelo de relaçom desigual e imperialista promovida polos EUA para a América Latina sob o nome de ALCA. Assim, Petrocaribe inclui condiçons de pagamento muito favoráveis para os países da zona, que desse jeito terám acesso ao petróleo venezuelano, ao tempo que as poupanças derivadas se destinam a fundos para programas concretos de desenvolvimento sócio-económico dos respectivos países. Entre as colaboraçons sociais previstas de partida, acham-se as relacionadas com os desastres naturais, tema em que Cuba disponibilizará a sua experiência no exitoso combate aos furacáns que periodicamente atacam as naçons dessa regiom. O atendimento e a formaçom de profissionais da medicina som outro conteúdo incluído entre os objectivos marcados no acordo que, em palavras de Chávez, irá servir para ajudar à transformaçom das sociedades latino-americanas, tornando-as "mais justas, cultas, participativas e solidárias".

A proposta venezuelana agora iniciada fai parte do projecto estratégico denominado Alternativa Bolivariana para as Américas (ALBA), contrário ao mercantilismo e o imperialismo norte-americanos que sustentam a ALCA (Área de Livre Comércio das Américas). De facto, está prevista já umha maior projecçom da inicitiva, através da coordenaçom com Petroandina e Petrosul, no caminho de umha plena integraçom da América Latina nom condicionada polo tradicional "amo ianque".

 

:: Mais nformaçons sobre o mesmo tema

Solidariedade cubana: graduaçom de 1610 estudantes da Escola Latino-Americana de Medicina (+...)

 

Voltar à página principal

 

 

Bolivar e Martí: imagem alegórica da aliança estratégica entre Cuba e Venezuela em prol da integraçom dos povos da América Latina