"Presidente Quintana" apresenta-se aos meios acompanhado pola bandeira espanhola

17 de Março de 2006

Haverá quem diga que nom é um facto relevante, mas quando a sua própria organizaçom "presume" do desempenho dos labores de "presidente por um dia" por parte de Anxo Quintana, em substituiçom de Emilio Peres Tourinho, definindo o "fito" como o do "primeiro presidente nacionalista" na nossa história, convém situarmos o simbolismo nos seus verdadeiros termos.

Lembremos que, nas primeiras semanas de legislatura, os media dérom relevo à polémica sobre o uso ou nom uso de bandeiras de Espanha nos actos institucionais protagonizados por altos cargos do BNG, a partir da "desapariçom" de algumha bandeira monárquica espanhola em actos públicos protagonizados por algum conselheiro ou director geral do Bloque. A verdade é que outros cargos do BNG usárom a "roja-y-gualda" desde o primeiro dia, mas o facto parecia indicar algumha vontade de afirmaçom nacional.

Agora é a cara pública por excelência do BNG o que, também neste aspecto, representa a cedência do autonomismo perante a pressom mediática e a falta de firmeza nos supostos próprios princípios. Em lugar de fazer da afirmaçom galega e sem complexos um signo diferencial, o BNG quer deixar claro, também na política de símbolos, que a sua assimilaçom do que o sistema marcar como "politicamente correcto" nom tem limites.

Ontem tivemos ocasiom de comprová-lo quando, na conferência de imprensa a seguir ao primeiro Conselho da Junta presidido por Anxo Quintana, este apareceu diante das cámaras acompanhado pola bandeira de Espanha, sem que parecesse sofrer qualquer tipo de complexo polo facto. Polo contrário, os responsáveis do web da sua organizaçom política decidírom trucar a realidade cortando a foto de maneira que parecesse que só estava acompanhado pola bandeira da Galiza.

Umha vez que o BNG parece querer mimetizar-se com políticas de morno nacionalismo como o do PNB ou CiU, é mágoa que na exibiçom de simbologia nom chegue nem à altura do PSC de Maragall, mostrando tam pouca dignidade nacional.

 

Voltar à página principal

 

 

Quintana sem complexos: o consenso PP-PSOE-BNG atinge também na assunçom e difusom da simbologia espanhola