Bases Democráticas Galegas anunciam convocatória autodeterminista para o Dia da Pátria

16 de Junho de 2006

As Bases Democráticas Galegas, organismo suprapartidário que nos últimos meses promoveu umha campanha contra o Estatuto de Autonomia e pola autodeterminaçom, anunciam no seu web nacional a convocatória de umha manifestaçom nacional no Dia da Pátria deste ano.

Sob a legenda "Estatutos nom. Autodeterminaçom", as Bases convocam às 13 horas do dia 25 de Julho na capital da Galiza umha manifestaçom que quer contestar o processo de reforma estatutária, por excluir o direito de autodeterminaçom. Segundo a declaraçom pendurada no web das Bases, "Um estatuto de autonomia é um resultado tam legítimo como outro qualquer num processo de autodeterminaçom, mas a autodeterminaçom sempre vai antes."

A entidade soberanista afirma que "a reforma do Estatuto é, novamente, a maneira que tenhem o aparelho do Estado e os seus representantes na Galiza de furtar o legítimo direito de autodeterminaçom, para além das discussons nominalistas sobre se Estatuto de Naçom sim ou nom." Daí que as Bases resolvessem convocar neste 25 de Julho umha mobilizaçom nacional que aspira a ser apoiada "por um amplo e plural abano das forças políticas, sindicais e sociais que defendemos a liberdade do nosso país", em defesa do direito de autodeterminaçom, que "nom pode submeter-se aos interesses partidistas".

A declaraçom das Bases em que se informa desta convocatória em defesa dos direitos nacionais pode ser lida na íntegra no seu web nacional, em que também informam do desenvolvimento doutras iniciativas recentes dessa entidade nacional suprapartidária.

 

Voltar à página principal