BNG apoia candidatura da direita regionalista catalá

23 de Outubro de 2006

O BNG nom quijo deixar passar a ocasiom de manifestar o seu inequívoco apoio à burguesia regionalista catalá nas eleiçons ao Parlamento autónomo do Principat de Catalunha, mandando o porta-voz e vice-presidente da Junta, Anxo Quintana, junto da formaçom "irmá" de Convergència i Unió.

Foi a própria formaçom liderada por Artur Mas que identificou o BNG e o PNB como organizaçons "irmás" na Galiza e o País Basco, respectivamente. Josu Jon Imaz, do PNB, e Anxo Quintana, do BNG, coincidírom num comício em apoio a Artur Mas e Duran i Lleida, dentro da campanha autonómica catalá para as eleiçons do próximo dia 1 de Novembro, e o líder do BNG nom deixou de luzir o vácuo discurso a que nos tem afeit@s: "Gostamos da gente que ama o seu país, que luita polo seu país e o coloca à frente de qualquer outra cousa..."

Nom explicou foi se gostou também dos numerosos casos de corrupçom que inçárom os longos anos de governo "convergente" no Principat, ou da política social de linha dura neoliberal que CiU defende e aplica sem concessons nas parcelas de poder institucional que controla.

Quintana limitou-se no comício em Barcelona a apostar na reforma do Estado espanhol para o converter em entidade que reconheça o "carácter plurinacional de Espanha", situando a "utilidade" do BNG, CiU e PNB no facto de oferecerem umha interlocuçom a Madrid, que "já sabe que quando quer acordar algo com a Catalunha, Euskádi e Galiza tem forçosamente que falar com os nacionalistas" (em referência aos regionalismos burgueses).

O BNG segue assim no encalço das forças regionalistas burguesas basca e catalá, com Espanha como "terreno de jogo" incontornável e alheio à aspiraçom de qualquer força nacionalista em qualquer lugar do mundo: a autodeterminaçom na perspectiva de um Estado soberano. Já no plano social, o alinhamento com a direita pactista periférica situa perfeitamente o horizonte ideológico estratégico previsto pola formaçom autonomista galega.

 

Voltar à página principal