Primeira Linha mantivo encontro com Partido Comunista de Cuba em Havana

Teresita Trujillo, Carlos Morais e Juan Carlos Marsán Aguilera, nas instalaçons do Comité Central do Partido Comunista de Cuba, durante o primeiro encontro oficial entre @s camaradas cuban@s e Primeira Linha

27 de Setembro de 2006

Umha delegaçom do nosso Partido, encabeçada polo secretário-geral, reuniu em Havana com Teresita Trujillo Hernández, responsável para a Europa do Departamento de Relaçons Internacionais do PCC.

No encontro, que tivo lugar no passado dia 22 de Setembro nas instalaçons do Comité Central do PCC, na praça da Revoluçom da capital cubana, Carlos Morais transmitiu a solidariedade das comunistas e os comunistas galegos com o processo revolucionário cubano, interessando-se pola saúde do Comandante Fidel Castro.

Na entrevista entre ambas organizaçons, a dirigente do PCC ofereceu interessantes informaçons sobre a situaçom socioeconómica actual na ilha e das medidas adoptadas para fazer face aos três principais problemas que padece Cuba por causa do bloqueio norte-americano e da situaçom criada em 1990, após a queda da Uniom Soviética e dos países do leste europeu: vivenda, transporte e alimentaçom.

As impressons, valorizaçons e dúvidas do secretário-geral de Primeira Linha na viagem realizada durante duas semanas polas províncias orientais e do centro-oeste e leste de Cuba fôrom abertamente abordadas na reuniom que se prolongou por mais de hora e meia.

Posteriormente, Carlos Morais manifestou a vontade e plena disposiçom da nossa militáncia para fortalecer a solidariedade internacionalista com Cuba, impulsionando campanhas de carácter unitário que incidam na divulgaçom da situaçom actual da Revoluçom e na situaçom dos cinco presos políticos encadeados polos Estados Unidos desde 1999 sob a falsa acusaçom de espionagem. Também se abordou e concretizou a criaçom de umha brigada galega de solidariedade que se desloque no vindouro ano a Cuba.

Antes de finalizar a reuniom, incorporou-se Juan Carlos Marsán Aguilera, também do Departamento de Relaçons Internacionais do PCC, para cumprimentar e conhecer a delegaçom comunista galega, manifestando a sua satisfaçom pola visita e interesse de Primeira Linha em conhecer e apoiar a construçom do socialismo cubano e encorajando a que o povo trabalhador galego conheça de primeira mao os defeitos e virtudes da Revoluçom iniciada em 1953 com o assalto ao quartel Moncada.

Primeira Linha transmite agora publicamente a sua satisfaçom por este importante encontro, que marca o início de relaçons formais entre ambas organizaçons revolucionárias, coincidindo com o X Aniversário do nosso partido, e servindo para fortalecer a histórica amizade entre a Galiza e Cuba.

 

:: Mais informaçons sobre o mesmo tema

NÓS-UP deseja as melhoras a Fidel e reafirma apoio à Revoluçom Cubana (+...)

 

Voltar à página principal