Democracia e partidos

18 de Outubro de 2006

Publicamos um artigo de opiniom de Igor Lugris, com umha reflexom sobre a democracia nos partidos, a partir de um caso de actualidade na Catalunha em campanha.

Democracia e partidos

Igor Lugris

Agora que começou a campanha eleitoral para as eleiçons autonómicas na Catalunha, andam, como sempre, os jornalistas alborotados, cagando sentenças polas esquinas, e explicando-nos, aos pobres mortais, como é que o melhor que se pode passar é o que eles dim que se deve passar, e nom o que livremente os e as cataláns puderem decidir que se passe.

Hoje na rádio, na rádio progre espanhola por antonomásia, vários jornalistas e "expertos", explicavam como ERC é umha organizaçom que nom oferece garantias, porque nom é séria, nom é responsável. Em que se baseavam para dizer isto? Em que, no processo de reforma do Estatut da Catalunha, finalmente ERC defendeu nom o que umha parte da sua Direcçom queria defender, mas o que as suas bases, quer dizer, a maioria, a imensa maioria da organizaçom, quijo defender.

Com que é que ficamos ? Nom é que os partidos políticos, para serem legais, devem ser democráticos, respeitar a democracia, e toda essa lenga-lenga burguesa? Pois entom, como é que se pode criticar um partido por fazer e defender o que maioritariamente as pessoas que fam parte desse partido decidem? É que obviar a opiniom dos e das membros dumha organizaçom, e fazer o que os dirigentes decidirem, sem ouvir nem ter em conta as opinions dos e das suas filiadas, pode ser considerado "democrático"?

Haverá, de facto há, muitas razons para criticar ERC, mas nom precisamente essa: criticar a sua democracia interna. Nom será, antes, que é que os outros partidos nom é que nom sejam sérios ou responsáveis, o que nom som é "democráticos"? Nom será que com as Leis na mao (as leis espanholas, as mesmas que eles mesmos promulgárom) haveria motivos para a sua ilegalizaçom, por nom terem um funcionamento interno democratico? Nom di a sacrossanta Constituiçom espanhola algumha cousa ao respeito?

 

Voltar à página principal