Candidato do BNG assiste em Ferrol, convidado pola Guarda Civil, à festa do "Dia de la Hispanidad"

13 de Outubro de 2006

Quais os mínimos exigíveis a qualquer força política autoproclamada "nacionalista galega" para poder ser considerada como tal? O BNG continua a fazer méritos em sentido contrário, com a sua desenvergonhada colaboraçom nom apenas com as políticas "de Estado", mas inclusive em actos simbólicos dotados da maior carga reaccionária e anti-galega.

O último exemplo tivemo-lo na manhá de ontem em Ferrol, com a participaçom do próximo candidato à presidência da Cámara Municipal, Xoán Xosé Pita, na Festa organizada pola Guarda Civil no recinto da FIMO, na Malata, com motivo do 12 de Outubro, "Dia de la Hispanidad" e santo padroeiro da Guarda Civil.

Xoán Xosé Pita, flamante candidato às próximas eleiçons municipais polo BNG, é o primeiro do lado esquerdo

Junto às "forças vivas" da cidade, no dia grande da Guarda Civil, o actual representante municipal do BNG e iminente candidato nom duvidou em brindar "por el rey", a proposta do Guarda Civil de mais alta graduaçom presente no evento, tal como podemos apreciar na fotografia acima, onde também destaca, de gravata lilás, o presidente da Cámara Municipal de Ferrol polo PP, Juan Juncal.

Nom vamos estender-nos na questom. Sobejam mais comentários perante a eloqüência da instantánea...

...e mais umha de Quintana

Entretanto, Anxo Quintana continua a dar mostras do seu calibre político. Perante as "acusaçons" do PP por alegadamente nom ter utilizado a bandeira monárquica espanhola num acto institucional na Argentina, o dirigente do BNG e vice-presidente da Junta da Galiza nom duvidou em informar que, durante o périplo no país sul-americano, participou em "dezenas de actos presididos polas bandeiras galega, espanhola e argentina".

Na verdade, devemos reconhecer que a versom de Quintana é, para nós, mais verossímil do que a dos nom menos renegados componentes da organizaçom galego-argentina do Partido Popular. Nesta altura, já pouc@s duvidam da fidelidade constitucional, "à prova de bomba", do BNG.

 

:: Mais informaçons sobre o mesmo tema

Tourinho e Quintana: dueto em defesa do novo Estatuto e da unidade de Espanha (+...)

BNG quer levar os seus complexos ao novo texto estatutário (+...)

 

 

Voltar à página principal