Quintana di que a Galiza "conta com o PP" para reformar o Estatuto

31 de Julho de 2006

O porta-voz do BNG, Anxo Quintana, afirmou perante os meios de comunicaçom que a sua reuniom no Hostal dos Reis Católicos, no passado sábado, com o líder da extrema-direita na Galiza, Alberto Núñez Feijó, deu como resultado que o PP está já disposto a falar de identidade para umha definiçom da Galiza no próximo Estatuto de Autonomia.

Quintana admitiu a proposta de financiamento estatal da autonomia proposta por Feijó, pedindo em troca que se poda negociar a definiçom da comunidade autónoma como "naçom" [ou "naçom de Breogám", como o PSOE propom?]. O vice-presidente da Junta acredita que na Galiza "estamos em melhor situaçom que noutras partes [do Estado] para contar com o PP".

Sendo isso certo, estaríamos no caminho de contar com um Estatuto mais avançado que os já aprovados (nomeadamente o catalám), algo que Quintana nom acreditará nem em sonhos. Ou é mentira que o PP seja tam "bondoso", ou som o PSOE e BNG os que nom querem dar passos à frente em relaçom ao Estatuto catalám, ou entom o líder do BNG está outra vez a contar-nos um conto dos dele.

Jorquera segue o ronsel de CiU

Entretanto, Francisco Jorquera, senador do BNG no Senado espanhol graças aos votos do PP, contou às juventudes do Bloque, durante os actos de homenagem prévios ao 25 de Julho, que a reforma estatutária conduz para a autodeterminaçom pola via catalá. Em linha com CiU e frente ao critério político de ERC, Jorquera afirmou que o BNG aspira "ao mesmo status político que já atingiu a Catalunha com o seu novo Estatuto".

 

Voltar à página principal