Siareir@s Galeg@s denuncia "antidemocrática legislaçom espanhola" que impede a Galiza participar no Mundial

10 de Junho de 2006

Coincidindo com a inauguraçom da XVIII ediçom do Campeonato do Mundo da FIFA, o colectivo de Siareir@s Galeg@s difundírom no seu web um comunicado em que reivindicam "o direito da Galiza a ter selecçons nacionais próprias a nível oficial e a luitar contra os vetos e imposiçons aos nossos direitos nacionais no terreno desportivo".

Culpabilizando directamente "antidemocrática legislaçom espanhola", o movimento de Siareir@s Galeg@s afirma claramente que "a selecçom espanhola nom nos representa, que nom é a nossa selecçom nem nos identificamos com ela", denunciando que "O Estado espanhol, através das instituiçons e os meios de (des)informaçom tenta fomentar o espanholismo arredor da selecçom espanhola de futebol".

O pronunciamento público difundido pol@s Siareir@s Galeg@s dirige umha mensagem à Junta da Galiza e à Secretaria Geral para o Desporto, lembrando-lhes que "devem seguir dando passos para que a selecçom galega de futebol, junto com as dos demais desportos, seja umha realidade, e o contexto do Campionato do Mundo é umha boa oportunidade para demonstrar que as instituiçons realmente caminham face esse objectivo". Acrescenta que "Achamos que agora só resta avançar, para que na próxima Taça do Mundo, na África do Sul, a Galiza também poda estar presente."

Em relaçom com o Mundial de futebol, o mesmo portal a que fazemos referência reproduz um interessante artigo de opiniom que analisa a campanha chauvinista espanhola coincidindo com o citado evento futebolístico, cuja leitura recomendamos.

Outras iniciativas em curso

O colectivo Siareir@s Galeg@s, principal impulsionador social das reivindicaçons nacionais no ámbito desportivo, tem tido nas últimas semanas outras iniciativas em defesa das selecçons nacionais galegas, tais como o apoio à estreia da selecçom de basquetebol, prevista para 28 de Junho no Pavilhom Universitário de Lugo. @s Siareir@s estarám no jogo contra a selecçom do Japom, afritrioa da próximo Campeonato mundial da especialidade.

Outras informaçons relativas a desportos como o ciclismo ou o triatlo fôrom incorporadas a um web que se mantém ao dia em todo o relativo à torcida galega em todas as especialidades desportivas.

 

 

Voltar à página principal