Êxito do "Sons Jovens": Cultura popular, galega e sem subsídios funciona

29 de Maio de 2006

A organizaçom juvenil da esquerda independentista BRIGA demonstrou na passada sexta-feira que a aposta na cultura popular, galega e à margem dos financiamentos clientelares das instituiçons funciona.

Foi na capital da nossa naçom com motivo das festas padroeiras, e em contraposiçom com o programa oficial promovido polo PSOE e o BNG, que mais umha vez investírom o dinheiro dos compostelanos e as compostelanas em promover "estrelas" televisivas espanholas como David Civera, Bisbal ou Estopa, alheias por completo à Galiza e à necessária promoçom da nossa cultura nacional em todas as manifestaçons em que se expressa.

A aliança entre BRIGA e a importante rede de grupos musicais de jovens compostelan@s, sistematicamente desprezados polas instituiçons, deu como resultado umha festa carregada de diversom e reivindicaçom de umha outra cultura. Os Veraneantes (charanga), Grhumo (death-metal), Brêtema, Ice Wind e Codename atraírom numeroso público compostelano à Porta do Caminho, denunciando a falta de meios públicos para o desenvolvimento da actividade artística de base no Concelho de Compostela.

O silenciamento e falta de colaboraçom da instituiçom municipal nom pudo impedir que a iniciativa de BRIGA fosse bem sucedida, conjugando a reivindicaçom de locais de ensaio, a possibilidade de ediçom de obras e ajudas públicas, com a diversom de umha jornada musical que pujo sobre a mesa a qualidade e vontade de trabalhar pola música galega dos grupos compostelanos.

Nom é a primeira vez que a juventude revolucionária e independentista organizada em BRIGA promove a música de base produzida na Galiza. Recentemente, organizou concertos similares em Ferrol e Ponte Vedra, coincidindo com o 10 de Março (Dia da Classe Obreira Galega) e o 1º de Maio (Dia do Internacionalismo Proletário), respectivamente.

Podes ver umha completa crónica e galeria fotográfica sobre o Sons Jovens no web nacional de BRIGA.

 

:: Mais informaçons sobre o mesmo tema

Juventude independentista em andamento: Sons Jovens em Compostela (+...)

 

Voltar à página principal