Quatro militantes de NÓS-UP serám julgados por pintarem de cor de rosa umha Cruz fascista em Neda

Umha faixa em solidariedade com os quatro militantes de NÓS-UP acusados de pintarem umha "Cruz dos Caídos" em Neda apareceu pendurada na fachada da Cámara Municipal desse concelho

20 de Abril de 2007

NÓS-Unidade Popular enfrenta um novo julgamento no próximo 26 de Abril, como resultado da campanha que vem realizando durante o último ano e meio para reivindicar a retirada da simbologia franquista dos espaços públicos e edifícios da Galiza. Quatro militantes da comarca de Trasancos fôrom denunciados polo Governo municipal de Neda por pintarem de cor de rosa a chamada "Cruz dos Caídos" existente na principal estrada da vila trasanquesa.

Assistimos a mais um capítulo deste "mundo ao contrário" em que os governos ditos "democráticos" mantenhem em pé estátuas e outros elementos de exaltaçom do fascismo, enquanto as democratas e os democratas que exigem a retirada desse insulto à memória do 36 som denunciados e levados a tribunal.

A situaçom fica ainda mais paradoxal quando comprovamos que a denúncia corresponde a um governo municipal formado por umha coligaçom entre o PSOE e Izquierda Unida (IU), organizaçons teoricamente contrárias à permanência dos símbolos fascistas nas ruas da Galiza.

Dentro das iniciativas de denúncia que NÓS-UP já começou a realizar por causa do julgamento aos seus quatro militantes, umha faixa apareceu pendurada na tarde de ontem na mesma fachada da sede municipal do concelho de Neda. Na faixa podia ler-se "26 de Abril: julgamento a 4 antifascistas. PSOE-IU nom retiram simbologia fascista, perseguem a quem a retira".

No web nacional da formaçom independentista e socialista, pode ser lido um texto em que se explicam as circunstáncias que rodeiam este novo caso de repressom antidemocrática por parte das instituiçons espanholas na Galiza, que parte da pintagem simbólica de umha cruz dedicada explicitamente a José Antonio Primo de Rivera e a outros integrantes das fileiras golpistas do fascismo espanhol.

 

:: Mais informaçom sobre o mesmo tema

[Vídeo amador] Faixa em solidariedade com 4 antifascistas na fachada da Cámara Municipal de Neda (+...)

 

Voltar à página principal