Abril galego: Centros Sociais fam propostas de lazer e compromisso social

6 de Abril de 2007

A dinámica dos centros sociais galegos continua in crescendo. O mês de Abril reserva grande número de iniciativas musicais, formativas, ao livre e, em geral, marcadas polo compromisso com a Galiza com parámetros de esquerda. Apresentamos a seguir umha mostra das programaçons já feitas públicas por alguns dos centros sociais mais activos nos últimos tempos.

Galiza Sul

Começando polo Sul, a Baiuca Vermelha, conjuntamente com o ponte-vedrês Revira e com o compostelano Henriqueta Outeiro, coordenam o périplo divulgativo do professor e investigador Carlos Solha, que ofereceu já umha palestra em Ponte Vedra no mês de Março sob o título "Mitologia Popular Galega: amuletos e objectos de poder". No passado dia 29, foi em Compostela, e no dia 21 de Abril será na vila condadense de Ponte Areas.

Também na Baiuca, está em andamento a campanha do Voluntariado pola Língua, que segue o encalço da iniciativa da compostelana Gentalha do Pichel. Em Ponte Areas, contam já com cinco pontos públicos de activaçom, e com a participaçom de populaçom imigrante numha proposta de integraçom muito positiva para o nosso país e para a nossa língua.

Ainda na Baiuca Vermelha, haverá um jantar popular no dia 14 e um leilom de apoio ao centro social no domingo 22, umha ocasiom para que os sectores mais comprometidos de Ponte Areas dem apoio a esta iniciativa popular de construçom nacional e social da Galiza. Podes aceder aos pormenores destas e outras actividades no web da Baiuca Vermelha.

No centro social da ponte-vedresa Revira, permanece activa umha exposiçom fotográfica de alunos e alunas de Belas Artes na cidade, que está a ser muito bem acolhida em termos de assistência de público. Também tenhem agendado um roteiro a pé para o dia 15 de Abril, conjuntamente com a Assembleia Aberta da Baiuca Vermelha, ao Monte Seixo, a Montanha Mágica, lugar de referência para a cultura imaterial e a mitologia popular da nossa naçom, ameaçado pola construçom de um parque eólico. Toda a informaçom sobre estas iniciativas no blogue da Revira.

Em Ourense, desenvolve-se no centro social A Esmorga um ciclo de cinema sob o mote genérico de "Cinema e resistência", em que serám projectadas as fitas "Sophie School", "O que é isso, companheiro?", "Moncho Valcarce, o cura das Encrovas" e "A quarta guerra mundial", nos dias 3, 10, 17 e 21. Mais informaçons no blogue da Esmorga.

Galiza centro

Em Compostela, o processo de dinamizaçom do centro social Henriqueta Outeiro leva à convocatória de umha Assembleia Aberta para alargar a participaçom na gestom do centro social independentista, convocada para 10 de Abril às 20 horas. Caso mores na capital e tenhas interesse em participar, nom perdas a ocasiom de te incorporares ao projecto.

Galiza norte

Em Ferrol (Trasancos), a Fundaçom Artábria organiza concertos cada fim de semana com os diversos géneros da música galega como protagonista: Neste sábado, dia 7 de Abril, às 22.30h, tocam os Retobato (Punk-Rock). No dia 14, também sábado, Esterko, de Carral, à mesma hora. No dia 21 (sábado), o ska de Cogito, de Vigo, e no último sábado do mês, dia 28, dous grupos: Ofensiva, também de Vigo, mais o grupo catalám de hardcore Answer.

Com certeza, faltam actividades e centros sociais neste rápido olhar à vida dos espaços auto-geridos polo nosso movimento popular. Contodo, achamos o repasso significativo e aliciante para aderir à dinámica de construir o nosso país no ámbito sociocultural sem esperar polos subsídios de nengumha instituiçom...

 

Voltar à página principal