Assembleia de Mulheres do Condado convoca IV Certame Literário Feminista e estreia espaço próprio na Internet

12 de Abril de 2007

A AMC estreou blogue próprio coincidindo com a convocatória do seu Certame anual dedicado a promover a criaçom literária das mulheres em galego. É o quarto ano consecutivo que a entidade feminista condadesa convoca o chamado "Certame Literário Feminista do Condado", umha convocatória consolidada que conta com cada vez mais colaboraçons e apoios no seio da comarca do sul da Galiza.

O IV Certame estabelece um prazo até 31 de Agosto para a apresentaçom de trabalhos, contando com um prémio de 300 euros para a ganhadora, que deverá tratar temas relacionados de algumha maneira com a problemática social das mulheres. Reproduzimos a seguir as bases feitas públicas pola AMC, que podem ser também consultadas no novo blogue da entidade feminista do Condado.

IV CERTAME LITERÁRIO FEMINISTA DO CONDADO

Bases

  1. A Assembleia de Mulheres do Condado (AMC) convoca o IV Certame Literário Feminista do Condado, com o objectivo de reivindicar os direitos das mulheres e denunciar a nossa marginalizaçom e exploraçom.

  1. A temática será livre sempre que esteja relacionada directa ou indirectamente com a situaçom de opressom, dominaçom e exploraçom que padecem as mulheres no actual sistema patriarcal.

  1. Poderám participar todas as mulheres que o desejarem sem limites de idade.

  1. Os trabalhos serám apresentados exclusivamente em língua galega.

  1. O certame está aberto a qualquer género literário (romance, poesia, teatro, ensaio).

  1. O júri é constituído por cinco mulheres representativas da comarca.

  1. O prémio estará dotado com 300 euros, podendo o júri declará-lo deserto ou dividir a quantidade citada em accesits na sua totalidade ou em parte.

  1. O prazo de apresentaçom de trabalhos finaliza na sexta feira dia 31 de Agosto de 2007.

  1. Os trabalhos serám apresentados por triplicado num envelope em que se fará constar na parte exterior o título e um pseudónimo da autora e, em envelope diferente, identificado com o título do trabalho e o seu pseudónimo, serám entregues os dados pessoais da autora: nome e apelidos, Bilhete de Identidade (BI), endereço, telefone de contacto.

Os envelopes serám enviados por correio certificado ao Local Social Baiuca Vermelha Rua Redondela nº11 rés-do-chao C.P. 36860 de Ponte Areas, a nome da AMC.

  1. O trabalho ou trabalhos premiados ficarám em propriedade da Assembleia de Mulheres do Condado. Embora a autora ou autoras manterám os seus direitos sobre segundas ou posteriores ediçons de ser publicado o trabalho premiado.

  1. Os trabalhos nom premiados ficarám a disposiçom das autoras durante um prazo de dous meses umha vez atribuído o prémio. Após finalizar este período de tempo, serám destruídos.

  1. A interpretaçom das presentes bases som atribuiçom do júri.

  1. A decisom do júri é inapelável.

  1. A participaçom no prémio supom a aceitaçom das suas bases.

 

Voltar à página principal