Debate público entre PP e NÓS-Unidade Popular?

3 de Março de 2007

Umha iniciativa da associaçom cultural O Fervedoiro, de Cúntis, pode servir para que, pola primeira vez, tenhamos ocasiom de ver um debate público entre representantes dos dous projectos políticos mais antagónicos existentes na Galiza actual: os representados polo Partido Popular e por NÓS-UP.

A referida associaçom dirigiu-se aos membros do governo autonómico, PSOE e BNG, para participarem num debate público sobre o processo de reforma estatutária. Ambos declinárom, ao nom estarem dispostos a tomar parte num debate em que esteja presente NÓS-Unidade Popular. Também o PP dixo que nom estaria, com o qual todo indicava que o debate se reduziria à própria NÓS-UP e a Izquierda Unida, que, como a formaçom independentista, sim se mostrou disponível.

Debate marcado para hoje às 20 horas

A última hora, O Fervedoiro informou de que o PP acudirá finalmente ao debate, que decorre hoje sábado, na Casa da Cultura “Roberto Blanco Torres”, de Cúntis. O seu representante será Jesus Palmou, deputado, ex-conselheiro e ex-secretário geral da filial galega do PP, que terá em frente -sobre isto nom há dúvida- o porta-voz de NÓS-Unidade Popular, Maurício Castro.

Resta comprovarmos se o PSOE e o BNG mantenhem o veto ou resolvem finalmente aparecer, numha vá tentativa final de lavarem a cara depois de terem metido pé na poça até o pescoço, ou se mesmo o Partido Popular mantém a palavra e aparece às 20h de hoje em Cúntis.

Entretanto, só nos resta parabenizar a entidade promotora de umha iniciativa popular que, aconteça o que finalmente acontecer, podemos afirmar já que foi um êxito. Esperamos poder informar proximamente do desenvolvimento do debate.

 

Voltar à página principal